18-oktyabr kuni Londonda bo‘lib o‘tayotgan “O‘zbekistonlik” III xalqaro forumida ko‘pchilikka tanilgan “O‘zbekistonlik” filmining 4-epizodi yopiq premyera qilinadi. Keng jamoatchilik esa uni 19-oktyabr kuni soat 18:00 da MY5 telekanalida va Uzbekistan’s club’ning YouTube’dagi rasmiy kanalida tomosha qilishi mumkin.
Filmning oldingi epizodlari ko‘plab tomoshabinlar e’tirofiga sazovor bo‘ldi va millionlab marotaba ko‘rildi.
Mushtariy Sharifova, Dmitriy Bogdanov, Aziz Shohakimov, Bobir Akilxanov va boshqalarning o‘rnak bo‘larli hayotiy yo‘llari ko‘plab yoshlarga ilhom bag‘ishladi. YouTube’dagi minglab sharhlar, ommaviy axborot vositalari va bloglardagi ko‘plab maqola va postlarning soni loyihaning muvaffaqiyatidan dalolat beradi.
Filmning yangi, 4-epizodida tomoshabinlar Buyuk Britaniyada aqlbovar qilmaydigan cho‘qqilarni zabt etayotgan qahramonlar: Kamola Mahmudova va Timur Yunusovlarning hikoyalari bilan tanishadilar. Filmning asosiy mavzulari atrof-muhit va yaqinlashib kelayotgan ekologik fojialar, shuningdek, inson kapitali va kuchli, bilimli millatni yuksaltirish bo‘ladi.
Timur Yunusov Buxoroda tug‘ilgan bo‘lib, ayni damda Kembrij universitetida biologiya fanlari doktori. Temur turlarning biologik xilma-xilligi bo‘yicha shug‘ullanib, ilmiy faoliyat olib bordi. Uning qobiliyatlarini Kembrij universiteti professorlari payqashdi va u yerda doktorlik dissertatsiyasini himoya qilish uchun qahramonimizga noyob imkoniyat taqdim etishdi. Bugun u sayyoramizda davom etayotgan iqlim o‘zgarishlari fonida O‘zbekiston taqdiridan xavotirda.
Kamola Mahmudova – Yevropa Tiklanish va Taraqqiyot Banki (YTTB) direktori. U Toshkentda tug‘ilgan, ammo 25 yildan ortiq vaqt davomida xorijda moliyaviy cho‘qqilarni zabt etib kelmoqda. Kamola bank-moliya sohasidagi faoliyati davomida og‘ir raqobatlarga bardosh berib, yuqori darajadagi menejer bo‘lib yetishdi. Uning yutuqlari Buyuk Britaniyadagi o‘zbek diasporasi orasida yuksak hurmatga sazovor.
Loyiha hamkorlari: Ucell mobil operatori va Turin politexnika universiteti. Loyiha “qanotlari” – UzAirways.
Uzbekistan’s club ijodiy jamoasi o‘tgan yillar davomida butun respublika yoshlarini ilhomlantirgan “O‘zbekistonlik” filmlarini qo‘llab-quvvatlagani va tadbirlarni yuqori saviyada o‘tkazishdagi bebaho yordami uchun Yoshlar ishlari agentligiga alohida va shuningdek, O‘zbekiston Respublikasi Tashqi ishlar vazirligiga ham o‘z minnatdorchiligini bildiradi.
“O‘zbekistonlik” III Xalqaro forumi doirasida nafaqat “O‘zbekistonlik” filmi, balki yangi media-loyihalar ham taqdim etiladi.
Jumladan, Uzbekistan’s club jilokor jurnalining o‘zbek va ingliz tillaridagi birinchi soni ham namoyish qilinadi. Forumda butun dunyo bo‘ylab eng muvaffaqiyatli vatandoshlar, xorijlik ishbilarmonlar, diplomatlar, yirik kompaniyalar rahbarlari ishtirok etadi.
Izoh (0)