AQSH Sohil qo‘riqlash xizmati mutaxassislari Atlantika okeanida cho‘kib ketgan “Titan” batiskafining bo‘laklari va inson qoldiqlarini topdi. Bu haqda departament matbuot xizmati ma’lum qildi.
AQSH Sohil qo‘riqlash xizmatining dengizdagi baxtsiz hodisalarni tekshirish komissiyasining xavfsizlik bo‘yicha muhandislari Shimoliy Atlantika okeani tubidan “Titan” bo‘laklari va ashyoviy dalillarni topib, olib chiqishdi, — deyiladi bayonotda.
Sohil qo‘riqlash xizmati mutaxassislari dalillarni “kataloglashtirish va tahlil qilish uchun” portga yuborishganini ta’kidlashdi.
Shuningdek, “Titan” bo‘laklari orasidan inson qoldiqlari ehtiyotkorlik bilan olinib, tahlil qilish uchun shifokorlarga yuborildi, — deyiladi xabarda.
19-iyun kuni OceanGate Expeditions kompaniyasi “Titanik” cho‘kib ketgan joyda sayyohlarni tashish uchun mo‘ljallangan “Titan” batiskafi bilan aloqa uzilgani haqida xabar bergandi. Uch kundan so‘ng AQSH Sohil qo‘riqlash xizmatining shimoli-sharqiy bo‘linmasi “Titanik” cho‘kkan joy yaqinida batiskaf qoldiqlari topilgani haqida xabar berdi.
Tez orada bo‘lim bular yo‘qolgan batiskafning qismlari ekanligini tasdiqladi. Tahlil shuni ko‘rsatdiki, okean tubiga sho‘ng‘igan batiskaf suv bosimi tufayli pachoqlanib, ichidagi barcha yo‘lovchilari halok bo‘lgan.
Kemada britaniyalik milliarder Xemish Xarding, OceanGate rahbari Stokton Rash, Fransiya dengiz floti faxriysi Pyer-Anri Nargeole va pokistonlik milliarder Shahzoda Dovud hamda uning 19 yoshli o‘g‘li Sulaymon bo‘lgan.
Izoh (0)