АҚШ Соҳил қўриқлаш хизмати мутахассислари Атлантика океанида чўкиб кетган “Титан” батискафининг бўлаклари ва инсон қолдиқларини топди. Бу ҳақда департамент матбуот хизмати маълум қилди.
АҚШ Соҳил қўриқлаш хизматининг денгиздаги бахтсиз ҳодисаларни текшириш комиссиясининг хавфсизлик бўйича муҳандислари Шимолий Атлантика океани тубидан “Титан” бўлаклари ва ашёвий далилларни топиб, олиб чиқишди, — дейилади баёнотда.
Соҳил қўриқлаш хизмати мутахассислари далилларни “каталоглаштириш ва таҳлил қилиш учун” портга юборишганини таъкидлашди.
Шунингдек, “Титан” бўлаклари орасидан инсон қолдиқлари эҳтиёткорлик билан олиниб, таҳлил қилиш учун шифокорларга юборилди, — дейилади хабарда.
19 июнь куни OceanGate Expeditions компанияси “Титаник” чўкиб кетган жойда сайёҳларни ташиш учун мўлжалланган “Титан” батискафи билан алоқа узилгани ҳақида хабар берганди. Уч кундан сўнг АҚШ Соҳил қўриқлаш хизматининг шимоли-шарқий бўлинмаси “Титаник” чўккан жой яқинида батискаф қолдиқлари топилгани ҳақида хабар берди.
Тез орада бўлим булар йўқолган батискафнинг қисмлари эканлигини тасдиқлади. Таҳлил шуни кўрсатдики, океан тубига шўнғиган батискаф сув босими туфайли пачоқланиб, ичидаги барча йўловчилари ҳалок бўлган.
Кемада британиялик миллиардер Хемиш Хардинг, OceanGate раҳбари Стоктон Раш, Франция денгиз флоти фахрийси Пьер-Анри Наргеоле ва покистонлик миллиардер Шаҳзода Довуд ҳамда унинг 19 ёшли ўғли Сулаймон бўлган.
Изоҳ (0)