Тошкент вилоятининг Олмалиқ шаҳридаги “Рамазон” (халқ тилида “Селина”) маҳалласидаги хонадонларга ичимлик суви қон аралаш келаётгани айтилган видео тарқалди.
Бизнинг кранимиздан қон оқяпти. Бунга қарайдиган, жавоб берадиган борми? Неча маротаба мурожаат қилганмиз, сувимизга труба ёрилиши оқибатида кушхонанинг ҳамма қонлари оқиб келиб, қўшилиб кетади. Биз шуни ҳар доим ичиб, касал бўляпмиз. Маҳалла раиси, ким жавоб беради бунга? Тегишли жойга айтинг, бўлмаса тепага чиқамиз биз. Кўряпсиз, қон оқяпти, ҳиди сассиқ. Болалар ичиб, ҳамма касал бўляпти, — дейди видео муаллифи МФЙ раисига мурожаат қилар экан.
Шаҳар ҳокимлиги мазкур ҳолат масъуллар эътиборига олинганини, муаммо бартараф этилаётганини билдирди.
Куни кеча Олмалиқ шаҳрининг “Рамазон” маҳалласидаги бир неча хонадондаги ичимлик суви жўмракларидан қонли сув оқиши кузатилган. Шаҳар “Сув таъминоти” корхонаси масъулларининг ҳолат юзасидан дастлабки маълумотига кўра, бу кушхонадаги оқова сув ва ичимлик сув қувурининг тешилиб, ўзаро қўшилиб кетиши сабабли кузатилган. Ҳолат зудлик билан масъуллар томонидан назоратга олиниб, ҳозирда таъмирлаш-тиклаш ишлари олиб борилмоқда, — дейилади Олмалиқ шаҳар ҳокимлиги ахборот хизмати тарқатган хабарда.
“Дарё”нинг бу ҳақдаги сўровига жавоб берган “Тошкент сув таъминоти” МЧЖ ахборот хизмати раҳбари Акбар Тоҳиров муаммо юзага келганини тасдиқлади.
15 та хонадон вақтида имкониятидан келиб чиқиб, қувур тортган ва хонадонларига ичимлик сувини олиб борган. Ўтган вақт давомида қувур чириб, тешилган ва кушхонадан чиққан сувлар билан аралашиб, шундай ҳолат юзага келган. Айни пайтда муаммо бартараф этилмоқда. Ичимлик суви қувури янгиланмоқда, — дейди масъул.
Қўшимча қилинишича, воқеа жойига санитария-эпидемиологик осойишталик ва жамоат саломатлиги хизмати вакиллари ҳам етиб бориб, вазиятни ўрганмоқда.
Изоҳ (0)