O‘zbekiston prezidenti Shavkat Mirziyoyev 1-oktyabr kuni Doha shahrida o‘ziga ajratilgan qarorgohda Power International Holding kompaniyasi boshqaruvi raisi Mutaz al-Hayyatni qabul qildi. Bu haqda Prezident matbuot xizmati xabar berdi.
Power International — dunyoning 19 ta mamlakatida energetika, neft-kimyo, sanoat, qishloq xo‘jaligi, transport infratuzilmasi, sog‘liqni saqlash, turizm kabi sohalarda faol ish olib borayotgan Qatarning eng yirik milliy xoldingi. Yaqin Sharqdagi yetakchi ko‘p tarmoqli kompaniyalardan biridir.
Bu kompaniya bilan hamkorlikda Jizzax viloyatida mintaqaning eng katta agrosanoat majmuasi bo‘ladigan zamonaviy chorvachilik klasteri qurilmoqda. Uchrashuvda istiqbolli loyihalar sifatida quyidagilar ko‘rib chiqildi:
- O‘zbekistonda yuqori tezlikda harakatlanishga mo‘ljallangan avtomobil magistralini barpo etish;
- ammiak va karbamid ishlab chiqarish hajmini oshirish;
- ishbilarmonlik va mehmonxona infratuzilmasi, sog‘liqni saqlash obyektlarini tashkil etish.
Qatar tomoni tez orada xolding O‘zbekistonda o‘z ofisini ochishini maʼlum qildi.
Shavkat Mirziyoyev Dohada
O‘zbekiston prezidenti Shavkat Mirziyoyev Qatar davlati amiri shayx Tamim ibn Hamad Ol Soniyning taklifiga binoan 1-oktyabr kuni davlat tashrifi bilan Dohaga tashrif buyurdi. Davlat tashrifi dasturiga muvofiq, 2-oktyabr kuni oliy darajadagi uchrashuvlar bo‘lib o‘tadi.
Yetakchilar O‘zbekiston-Qatar munosabatlarini yanada mustahkamlash hamda ko‘p qirrali hamkorlikni, eng avvalo, siyosiy, savdo-iqtisodiy, investitsiyaviy va madaniy-gumanitar sohalarda rivojlantirish masalalarini muhokama qiladi.
Izoh (0)