Zinedin Zidan murabbiylik postiga qaytmoqda. Mutaxassis fransuz klubini boshqaradi

Fransiyalik mutaxassis Zinedin Zidan bitta shart bilan “Marsel” bosh murabbiyiga aylanishi mumkin.

France Bleu nashrining xabariga ko‘ra, bir necha hafta oldin 51 yoshli mutaxassis Saudiya Arabistoni vakillari bilan muzokaralar o‘tkazgan va ular fransuz klubini sotib olsa, bosh murabbiy bo‘lishga tayyorligini ma’lum qilgan.

Saudiyaliklar tez orada “Marsel”ni “fransuz Nyukasli” qilish istagida va Zidanni bosh murabbiy sifatida olib kelmoqchi. Klubga transferlar uchun 300 million yevro ajratiladi. 

Biroq, “Marsel”ning hozirgi xo‘jayini Frenk Makkort klubni hali sotish istagida emasligini ma’lum qilgan. Makkort 7 yil oldin fransuz jamoasini 45 million yevroga sotib olgandi.

Zidanga “Real” va “Yuventus” ham qiziqish bildirmoqda. 

Eslatib o‘tamiz, Zinedin 2016-yildan 2018-yilga qadar va 2019 dan 2021-yilga qadar “Real” bosh murabbiyi sifatida faoliyat olib borgan. Uning qo‘l ostida jamoa uch marta Chempionlar Ligasida, ikki marta Ispaniya chempionatida zafar quchgan.