Kosovo shimolidagi otishma oqibatida bir politsiyachi halok bo‘ldi, yana biri yaralandi. Bu haqda mahalliy hukumat rahbari Albin Kurtiga tayanib, Reuters xabar berdi.
Kurti tegishli hodisani terakt deb baholadi, shuningdek, hujumchilar 30 kishidan ortiq bo‘lib, yaxshi qurollangani va tajribali jangchilar ekanini aytdi.
“Ayni vaqtda politsiya xodimlarimizga turli kalibrli o‘qotar qurollardan o‘q uzish davom etmoqda. Hujum qilganlar niqobli va qurollangan professionallar edi”, — dedi Kurti.
Reuters agentligining Kosovo xavfsizlik rasmiylariga tayanib xabar berishicha, hodisa erta tongda Banska qishlog‘i yaqinidagi ko‘prikda davlat raqamlari bo‘lmagan ikki mashina to‘xtab, harakatlanishni to‘sganida sodir bo‘lgan.
Ko‘p o‘tmay voqea joyiga yetib kelgan politsiyachilar o‘qqa tutilgan. Huquq-tartibot idoralari xodimlarining so‘zlariga ko‘ra, hujumchilar ixtiyorida nafaqat o‘q otish qurollari, balki qo‘l granatalari ham bo‘lgan. Keyinroq jangarilar mahalliy monastirda yashiringan, Kosovo politsiyasi hududni qurshab olgan.
“Qurolli guruhlar tomonidan hujumlar davom etmoqda. Bizning kuchlarimiz kamida 30 nafar og‘ir qurollangan shaxslarni qurshab oldi, ularni taslim bo‘lishga chaqiraman. Ular bizning politsiyaga hujum qilmoqda. Jinoyatchilar va ularning rahbarlari qo‘lga olinadi va jazolanadi”, — dedi Kurti.
Avvalroq Serbiya prezidenti Aleksandr Vuchich NATO bosh kotibi Yens Stoltenbergni Kosovo va Metoxiyadagi serblar xavfsizligini ta’minlashga chaqirgan edi. U bu BMT Xavfsizlik Kengashining 1244-rezolyutsiyasiga muvofiq Alyans kuchlari zimmasiga yuklanganini aytgan.
Izoh (0)