“Jarimalar bekor qilinishi kerak” — “Yuksalish” rahbari tadbirkorlar o‘rnatgan kameralar yozayotgan adolatsiz jarimalar haqida

So‘nggi kunlarda tadbirkorlik subyektlari tomonidan o‘rnatilgan yo‘l qoidabuzarliklarini qayd etuvchi kameralardagi kamchiliklar jamoatchilikni tashvishlantirmoqda. “Yuksalish” umummilliy harakati rahbari Bobur Bekmurodov shu munosabat bilan, IIV Yo‘l harakati xavfsizligi xizmatini tezkorlik bilan bir qator choralarni ko‘rishga chaqirdi.

Unga ko‘ra, mazkur tadbirkorlik faoliyati bilan shug‘ullanayotgan barcha subyektlarning so‘nggi haftalardagi qaydnomalarini taftish qilish va huquqiy baho berish choralarini ko‘rish, taftish natijasida noinsof tadbirkorlik yo‘li bilan undirilgan jarimalar aniqlangan taqdirda, ularni bekor qilish va haydovchilarga to‘lovlarni tadbirkorlar hisobidan qaytarish kerak.

Tadbirkorlik subyektlarining nazorat-kameralari orqali qayd qilinayotgan jarimalarni nazorat tartibida doimiy tekshirish amaliyotini joriy qilish, fuqarolarning adolatsiz jarimalar ustidan shikoyat qilishdagi ovoragarchilikdan asrash maqsadida, qaydnomalarga onlayn shikoyat berish imkoniyatini yaratish lozim.

Bundan tashqari, barcha lokatsiyalardagi radar o‘rnatilgani to‘g‘risidagi belgilar yonida cheklangan tezlikni aks ettiruvchi belgilarni o‘rnatishni majburiy qilish kerak.  

Shuningdek, bu boradagi faoliyat yuzasidan jamoatchilikka muntazam ravishda axborot berib borish amaliyotini yo‘lga qo‘yish maqsadga muvofiq.

“O‘z o‘rnida, piyodalar va yo‘l harakati ishtirokchilarining xavfsizligini taʼminlash maqsadida, fuqarolarimizni yo‘l harakati qoidalariga qatʼiy amal qilishlarini so‘raymiz”, — deydi “Yuksalish” rahbari.