Notanish shaxslarning yolg‘on va’dalari ta’sirida Hindistonga ketib, murakkab holatga tushib qolgan O‘zbekiston fuqarosi vatanga qaytarildi. Bu haqda “Dunyo” AA xabar berdi.
Ma’lum qilinishicha, 2021-yil iyunida Toshkent—Dehli yo‘nalishidagi samolyotda kelgan O.T.ning shaxsiy hujjatlarini unga mo‘may daromadli ish va’da qilgan kimsalar olib qo‘ygan. Keyin u turli tahdid va qo‘rqitishlar orqali noqonuniy faoliyat turi bilan shug‘ullanishga majbur qilingan.
Hindiston politsiyasi reydlarida qo‘lga tushib, hibsga olingan hamda boshqa ko‘plab noxush voqealarni boshidan kechirgan fuqaro O‘zbekiston elchixonasiga murojaat qilishi bilan unga zarur konsullik-huquqiy yordami ko‘rsatish bo‘yicha tezkor choralar ko‘rdi.
Xususan, uni vatanga qaytarish maqsadida elchixona diplomatlari Hindistonning tegishli idoralari bilan mazkur holat yuzasidan rasmiy muzokaralar o‘tkazdi. 13-avgust kuni O.T. Dehli—Toshkent aviqatnovi bilan O‘zbekistonga qaytdi.
“O‘zbekiston elchixonasi vatandoshlarimizni Hindistonga safar qilishdan oldin turli shubhali guruh yoki shaxslarning yolg‘on va’dalariga aldanib qolmaslik, ushbu mamlakatga kirish va unda bo‘lib turish chog‘ida mahalliy qonunchilik talablariga qat’iy rioya qilishga chaqiradi” — deyiladi xabarda.
Diplomatik missiya bunday holatlar yuzaga kelgan taqdirda zarur konsullik-huquqiy yordami ko‘rsatilishi uchun zudlik bilan quyidagi aloqa vositalarga murojaat qilishni tavsiya qiladi: telefon: +91 11 2467 0774/75 @consuluzbindia_bot
Izoh (0)