Нотаниш шахсларнинг ёлғон ваъдалари таъсирида Ҳиндистонга кетиб, мураккаб ҳолатга тушиб қолган Ўзбекистон фуқароси ватанга қайтарилди. Бу ҳақда “Дунё” АА хабар берди.
Маълум қилинишича, 2021 йил июнида Тошкент—Деҳли йўналишидаги самолётда келган О.Т.нинг шахсий ҳужжатларини унга мўмай даромадли иш ваъда қилган кимсалар олиб қўйган. Кейин у турли таҳдид ва қўрқитишлар орқали ноқонуний фаолият тури билан шуғулланишга мажбур қилинган.
Ҳиндистон полицияси рейдларида қўлга тушиб, ҳибсга олинган ҳамда бошқа кўплаб нохуш воқеаларни бошидан кечирган фуқаро Ўзбекистон элчихонасига мурожаат қилиши билан унга зарур консуллик-ҳуқуқий ёрдами кўрсатиш бўйича тезкор чоралар кўрди.
Хусусан, уни ватанга қайтариш мақсадида элчихона дипломатлари Ҳиндистоннинг тегишли идоралари билан мазкур ҳолат юзасидан расмий музокаралар ўтказди. 13 август куни О.Т. Деҳли—Тошкент авиқатнови билан Ўзбекистонга қайтди.
“Ўзбекистон элчихонаси ватандошларимизни Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақиради” — дейилади хабарда.
Дипломатик миссия бундай ҳолатлар юзага келган тақдирда зарур консуллик-ҳуқуқий ёрдами кўрсатилиши учун зудлик билан қуйидаги алоқа воситаларга мурожаат қилишни тавсия қилади: телефон: +91 11 2467 0774/75 @consuluzbindia_bot
Изоҳ (0)