59 yoshli Gollivud yulduzi Sandra Bullok 5-avgust kuni amiotrofik lateral sklerozdan vafot etgan 57 yoshli turmush o‘rtog‘i Brayan Rendallga qarash uchun kino karyerasida bir yil tanaffus qilgan, deb xabar bermoqda “Pravila jizni” nashri.
Rendall so‘nggi uch yil davomida bu kasallik bilan kurashgan professional fotograf edi. Shu bilan birga, u atrofdagilardan kasalligini yashirgan. Fotografning kasalligi haqida juda kam kishi bilardi, ularning orasida aktyor Chenning Tatum ham bo‘lgan. Aktyor Sandra Bullok bilan “Yo‘qolgan shahar” filmida rol o‘ynagan va 2022-yilning mart oyida uning premyerasida ko‘rinish bergan.
Rendallni “bir umrlik muhabbati” ekanini aytgan aktrisa karyerasida tanaffus olish niyati borligi haqida gapirib bergan. Shundan keyin Bullok suratga olish ishlarida qatnashmadi va atigi bir necha marta ko‘rinish berdi.
“Men shunchaki uyda bo‘lishni xohlayman. Doim bir suratga olish jarayonlaridan chiqib boshqasiga yugurardim. Endilikda faqat bitta narsa uchun javobgar bo‘lishni xohlayman”, — degan edi Bullok. Shu bilan birga, u faoliyatidagi tanaffus qancha davom etishini bilmasligini aytgandi.
Bullok va Rendallning munosabatlari
Bullok Rendall bilan 2015-yilning yanvar oyida aktrisa asrab olgan o‘g‘li Lui Bardoning tug‘ilgan kunini suratga olish uchun fotografni taklif qilganida tanishgan. O‘sha yilning oktyabr oyida jamoatchilik ularning munosabatlari haqida xabardor bo‘ldi.
Rendall bilan munosabat Bullokning besh yillik turmushidan keyin 2010-yilda teleboshlovchi Jessi Jeyms bilan ajrashish uchun ariza berganidan buyon birinchisi edi. Bu voqea ommaviy axborot vositalarida Jessining xiyonati haqidagi mish-mishlar paydo bo‘lganidan keyin sodir bo‘ldi, keyinchalik uning o‘zi ham bu ma’lumotlarni tasdiqladi.
Bullokning 13 yoshli Lui Bardodan tashqari 10 yoshda bo‘lgan Leyla ismli ham bor. Aktrisa qizaloqni 2015-yilning dekabr oyida o‘z vasiyligiga olgan.
Izoh (0)