O‘zbekistonda xizmat ko‘rsatgan artist Ra’no Zokirovani tasodifan aktrisa bo‘lgan desak mubolag‘a bo‘lmaydi. U bolalikdan raqs san’atiga qiziqqan va shunchaki tasodif sabab hayotini kino san’ati bilan bog‘lagan.
“Aslida balet artisti bo‘lishim kerak edi”
Aktrisa Ra’no Zokirova raqs maktabida tahsil olgan. U mashhur balet artisti bo‘lishni orzu qilardi. Ammo rejissor Ali Hamroyev “Vodillik kelin” filmiga aktrisa tanlash uchun Xoreografiya maktabiga boradi.
— Xoreografiyada o‘qib yurgan paytimda kichkina jussali, sochlari uzun qizaloq edim. Sochimni hamisha qirq kokil qilib o‘rib yurardim. Ali Hamroyev “Vodillik kelin” filmi uchun aktrisa izlab Xoreografiya maktabiga kelgan. Baxtga qarshi balet yo‘nalishida o‘qiydigan qizlar orasida bor-yo‘g‘i ikkita qiz o‘zbek millatiga mansub edi. Xullas, o‘zbek ekanligim va tashqi ko‘rinishimning mos kelgani rolga tanlanishimga asos bo‘lgan, — deydi aktrisa.
Kubayeva “ilib” ketgan rol
Aktrisa boy bergan roli haqida quyidagilarni aytib o‘tdi.
— 1985—1986-yillarda “Yalla” guruhi rahbari Farrux Zokirov bir taklif bildirgandi. Katta ko‘lamdagi “Maysaraning ishi” loyihasini yo‘lga qo‘yishni rejalashtirishgan ekan. U yerda mening raqqosa va aktrisalik faoliyatim qo‘l kelishi mumkin edi. Lekin rejissor Zinoviy Royzman ishlayotgan ertak-film ham aynan o‘sha vaqtga to‘g‘ri kelib qolgan. U paytlarda suratga olish jarayoni hozirgidek bir oy emas, uch oylab davom etardi. Nima qilishni bilmay qoldim, ammo “filmda sendan boshqasi o‘ynamaydi” deb, loyihani rad etishga ko‘ndirishdi. Hammasi hal bo‘lganida birdan film ijrosiga aktrisa Ra’no Kubayeva tayinlandi. Afsus, loyiha ham o‘z-o‘zidan yo‘qqa chiqdi. O‘shanda shunaqa yig‘ladimki… “Endi hech qachon yo‘limda uchragan omadni boy bermayman”, deb ahd qildim.
“Botir Zokirovning qiziman”
Ko‘pchilik aktrisani mashhur Zokirovlar sulolasiga taalluqli deb o‘ylaydi. Hatto, bir paytlar uni Botir Zokirovning qizi ham deb o‘ylashgan ekan.
— 1984-yili ilk — “Vodillik kelin” deb nomlangan filmda birgalikda ijod qilganmiz va Farrux Karimovich o‘sha “Sen ketarsan” qo‘shig‘ini chiroyli qilib yozib bergan. Qolaversa, jiyanlari Nargiza Zokirova ijrosida bu qo‘shiq rus tilida ilk bor yangragan. Keyin film olinib bo‘lingandan keyin bu qo‘shiqni o‘zbek tilida sevimli xonandamiz Kumush Razzoqova ijro etgan. O‘shandan keyin ham hamma Ra’no Zokirova, demak, bularning avlodiga taalluqli, Botir akaning qizlari ekan, deb o‘ylashgan.
1985-yilda “Orzular og‘ushida” deb nomlangan tarixiy film olingan edi, o‘sha yerda hammamizga sevimli bo‘lgan rahmatli Jamshid Zokirov otam rolini ijro etganlar. Birgalikda ishladik, titrda ham Jamshid Zokirov va Ra’no Zokirova ketgan edi.
Hayotda har doim u oilaga taalluqli joyim yo‘qligini aytib kelganman. Lekin bir marta yolg‘on ishlatishga majbur bo‘lganman. Taxminan, 1988-yilda “Ostankino”ga, Moskvaga kinosinovlarga taklif qilishgan. O‘shanda ham partnyorlarim — rahmatli Baxtiyor Zokirov, rahmatli Zokir Mo‘minov, Zuhriddin Rejametov va yana bir nechta aktyorlarimiz bilan o‘sha yerga borib kinosinovlardan o‘tib kelishimiz kerak edi.
Ayrim sabablarga ko‘ra, biletim kechroq olingan ekan. Hamma uchib ketyapti, men qolib ketyapman. O‘shanda direktorimiz meni orqa tarafdan aeroportga olib kirgan, shunda uchuvchilar bilan to‘qnashib qolganmiz. Shunda qirg‘izistonlik uchuvchi “Vodillik kelin”ni ko‘rgan ekan, menga qarab “Sen o‘sha, Botir Zokirovning qizimisan?”, degan.
O‘sha yerda ko‘z yoshlarim duv-duv yog‘ilgan va faxr bilan “Ha, men Botir Zokirovning qiziman”, deganman. Uchuvchi pasportimni ochganida u yerda Zokirova Ra’no Botirovna yozilgan. Shunda yolg‘on ishlatishga majbur bo‘lganman. Qirg‘izistonga uchib borganman. O‘sha yerda menga chipta olib, Toshkentga jo‘natib yuborishgan. Haqiqatan ham dadamning ham ismlari Botir Zokirov, — deydi Ra’no Zokirova.
Uzoqqa cho‘zilmagan turmush
Latofatli aktrisaning oshiqlari juda ko‘p edi. Uning turmushga chiqqani haqidagi xabar unga oshiq yigitlarni ranjitgani aniq. Afsuski, aktrisaning ilk turmushi uzoqqa cho‘zilmadi. U Umidjon ismli o‘g‘li bilan ajrashishga qaror qildi.
— Yaxshi inson bilan oila qurganman, ajrashishimizga esa shunchaki fikrlarimizning bir-biriga to‘g‘ri kelmagani sabab bo‘lgan. U insonga hamisha baxt tilayman, — degandi aktrisa intervyularining birida.
“To‘yimizga turmush o‘rtog‘imning qizi bosh-qosh bo‘lgan”
Birinchi turmushidan muvaffaqiyatsizligidan ancha vaqt o‘tib, u sport ustasi bilan oila qurgan. Ammo u insonning farzandlari bor edi. Aktrisa katta oilaga kelin bo‘lgani va bo‘yi yetgan farzandlarga onalik mas’uliyatini qanday qabul qilgani haqida quyidagilarni so‘zlab berdi.
— Ro‘za oylari edi. Syomkalardan ortib, kunduzi biroz uxlab olmoqchi bo‘ldim. Odatda uyquga ketsam, qo‘l telefonimni o‘chirib qo‘yardim. O‘shanda negadir o‘chirmadim. Endi ko‘zim ilingan ekan, telefonim jiringladi. Ko‘tarsam, bir erkak kishi o‘zini tanishtirib, sportga bag‘ishlangan teledastur boshlovchiligiga taklif etdi. Hayron bo‘lib, rad etdim. “Axir sport qayerda-yu men qayerda?! Konsert bo‘lganida bajonidil rozi bo‘lardim”, deb tushuntirishga urindim. “Nega yo‘q deyapsiz? Yaxshi pul to‘laymiz”, dedi u ko‘ndirishga urinib. Mendan ijobiy javob ololmagach, dangal gapirishga o‘tdi: “E-e-e… Muddaoga o‘ta qolay, siz bilan tanishmoqchi edim. Yosh emasman, uchta farzandim, bor…” Eng qizig‘i, begona odam bilan uch daqiqadan ortiq suhbatlashmasdim. Bu safar o‘z-o‘zidan gap-gapga ulanib ketaverdi. Roppa-rosa qirq daqiqa suhbatlashibmiz. Ikki kundan keyin qizi Kamola bilan telefonda gaplashdik. Bu suhbat ham uzoq — bir soat davom etdi. Bir-birimizni umuman ko‘rmagan bo‘lsak-da, gaplashib to‘ymasdik. Oradan bir necha kun o‘tib, uylariga taklif qilishdi. Borsam uy to‘la mehmon, bolalar va qarindosh-urug‘lar to‘planishgan ekan. Xuddi bir-birimizni avvaldan taniydigandek iliq qarshi olishdi. Oilaga mehrim tushib qoldi, shundan keyin qizim Kamola sarpo-suruq va holvalarni olib kelib fotiha marosimini o‘tkazdi. Kimdir ustimdan kuldi, kimdir baxt tiladi, — deydi aktrisa Ra’no Zokirova.
“Farzandlarimning onasidan minnatdorman”
Aktrisa turmush o‘rtog‘ining farzandlaridan mehr ko‘rgani va ularning onasidan hamisha minnatdor ekanligini yashirmaydi.
— Turmush o‘rtog‘imning birinchi rafiqasi uch farzandni dunyoga keltirib, ularga chiroyli tarbiya bergan. Ba’zi bolalar otalarini rashk qilishadi, sovuq munosabatda bo‘lishadi. Ammo menda unday bo‘lmagan. Qizim Asliya va o‘g‘lim Asliddin tug‘ilishida qizim Kamolaning katta yordami tekkan. U hamisha yonimda bo‘lib ruhiy madad bergan. Turmush o‘rtog‘imning marhum ayolining tavallud kunini hamisha nishonlardim. Eng qizig‘i, qizim aynan shu kuni dunyoga kelgan. Onadan ayrilgan o‘ksik qalblar mehrga tashna bo‘lishadi, deyishadi. Men ham imkon qadar farzandlarimizga mehr berishga harakat qilaman, — deydi aktrisa Ra’no Zokirova.
Ra’no Zokirova ko‘plab film va seriallarda suratga tushdi. Ammo uning tanilishida “Vodillik kelin” va “Yodgor” seriallarining o‘rni katta bo‘lgan. Aktrisa bir muddat teatrda ham faoliyat yuritgan. Ammo farzandli bo‘lgach, ma’lum sabablarga ko‘ra teatrdagi faoliyatiga yakun yasagan. Ayni kunlarda u asosan seriallarda suratga tushmoqda.
Aktrisa bu yil to‘ng‘ich o‘g‘li Umid Zokirovni uylantirdi. Ra’no Zokirova telenovellalarning birida yosh aktrisa bilan tanishib qoladi va uni o‘g‘li bilan tanishtiradi. Yoshlar bir-biriga ma’qul bo‘lib, oila qurishdi.
Izoh (0)