Ўзбекистонда хизмат кўрсатган артист Раъно Зокировани тасодифан актриса бўлган десак муболаға бўлмайди. У болаликдан рақс санъатига қизиққан ва шунчаки тасодиф сабаб ҳаётини кино санъати билан боғлаган.
“Аслида балет артисти бўлишим керак эди”
Актриса Раъно Зокирова рақс мактабида таҳсил олган. У машҳур балет артисти бўлишни орзу қиларди. Аммо режиссёр Али Ҳамроев “Водиллик келин” фильмига актриса танлаш учун Хореография мактабига боради.
— Хореографияда ўқиб юрган пайтимда кичкина жуссали, сочлари узун қизалоқ эдим. Сочимни ҳамиша қирқ кокил қилиб ўриб юрардим. Али Ҳамроев “Водиллик келин” фильми учун актриса излаб Хореография мактабига келган. Бахтга қарши балет йўналишида ўқийдиган қизлар орасида бор-йўғи иккита қиз ўзбек миллатига мансуб эди. Хуллас, ўзбек эканлигим ва ташқи кўринишимнинг мос келгани ролга танланишимга асос бўлган, — дейди актриса.
Кубаева “илиб” кетган рол
Актриса бой берган роли ҳақида қуйидагиларни айтиб ўтди.
— 1985—1986 йилларда “Ялла” гуруҳи раҳбари Фаррух Зокиров бир таклиф билдирганди. Катта кўламдаги “Майсаранинг иши” лойиҳасини йўлга қўйишни режалаштиришган экан. У ерда менинг раққоса ва актрисалик фаолиятим қўл келиши мумкин эди. Лекин режиссёр Зиновий Ройзман ишлаётган эртак-фильм ҳам айнан ўша вақтга тўғри келиб қолган. У пайтларда суратга олиш жараёни ҳозиргидек бир ой эмас, уч ойлаб давом этарди. Нима қилишни билмай қолдим, аммо “фильмда сендан бошқаси ўйнамайди” деб, лойиҳани рад этишга кўндиришди. Ҳаммаси ҳал бўлганида бирдан фильм ижросига актриса Раъно Кубаева тайинланди. Афсус, лойиҳа ҳам ўз-ўзидан йўққа чиқди. Ўшанда шунақа йиғладимки… “Энди ҳеч қачон йўлимда учраган омадни бой бермайман”, деб аҳд қилдим.
“Ботир Зокировнинг қизиман”
Кўпчилик актрисани машҳур Зокировлар сулоласига тааллуқли деб ўйлайди. Ҳатто, бир пайтлар уни Ботир Зокировнинг қизи ҳам деб ўйлашган экан.
— 1984 йили илк — “Водиллик келин” деб номланган фильмда биргаликда ижод қилганмиз ва Фаррух Каримович ўша “Сен кетарсан” қўшиғини чиройли қилиб ёзиб берган. Қолаверса, жиянлари Наргиза Зокирова ижросида бу қўшиқ рус тилида илк бор янграган. Кейин фильм олиниб бўлингандан кейин бу қўшиқни ўзбек тилида севимли хонандамиз Кумуш Раззоқова ижро этган. Ўшандан кейин ҳам ҳамма Раъно Зокирова, демак, буларнинг авлодига тааллуқли, Ботир аканинг қизлари экан, деб ўйлашган.
1985 йилда “Орзулар оғушида” деб номланган тарихий фильм олинган эди, ўша ерда ҳаммамизга севимли бўлган раҳматли Жамшид Зокиров отам ролини ижро этганлар. Биргаликда ишладик, титрда ҳам Жамшид Зокиров ва Раъно Зокирова кетган эди.
Ҳаётда ҳар доим у оилага тааллуқли жойим йўқлигини айтиб келганман. Лекин бир марта ёлғон ишлатишга мажбур бўлганман. Тахминан, 1988 йилда “Останкино”га, Москвага киносиновларга таклиф қилишган. Ўшанда ҳам партнёрларим — раҳматли Бахтиёр Зокиров, раҳматли Зокир Мўминов, Зуҳриддин Режаметов ва яна бир нечта актёрларимиз билан ўша ерга бориб киносиновлардан ўтиб келишимиз керак эди.
Айрим сабабларга кўра, билетим кечроқ олинган экан. Ҳамма учиб кетяпти, мен қолиб кетяпман. Ўшанда директоримиз мени орқа тарафдан аэропортга олиб кирган, шунда учувчилар билан тўқнашиб қолганмиз. Шунда қирғизистонлик учувчи “Водиллик келин”ни кўрган экан, менга қараб “Сен ўша, Ботир Зокировнинг қизимисан?”, деган.
Ўша ерда кўз ёшларим дув-дув ёғилган ва фахр билан “Ҳа, мен Ботир Зокировнинг қизиман”, деганман. Учувчи паспортимни очганида у ерда Зокирова Раъно Ботировна ёзилган. Шунда ёлғон ишлатишга мажбур бўлганман. Қирғизистонга учиб борганман. Ўша ерда менга чипта олиб, Тошкентга жўнатиб юборишган. Ҳақиқатан ҳам дадамнинг ҳам исмлари Ботир Зокиров, — дейди Раъно Зокирова.
Узоққа чўзилмаган турмуш
Латофатли актрисанинг ошиқлари жуда кўп эди. Унинг турмушга чиққани ҳақидаги хабар унга ошиқ йигитларни ранжитгани аниқ. Афсуски, актрисанинг илк турмуши узоққа чўзилмади. У Умиджон исмли ўғли билан ажрашишга қарор қилди.
— Яхши инсон билан оила қурганман, ажрашишимизга эса шунчаки фикрларимизнинг бир-бирига тўғри келмагани сабаб бўлган. У инсонга ҳамиша бахт тилайман, — деганди актриса интервьюларининг бирида.
“Тўйимизга турмуш ўртоғимнинг қизи бош-қош бўлган”
Биринчи турмушидан муваффақиятсизлигидан анча вақт ўтиб, у спорт устаси билан оила қурган. Аммо у инсоннинг фарзандлари бор эди. Актриса катта оилага келин бўлгани ва бўйи етган фарзандларга оналик масъулиятини қандай қабул қилгани ҳақида қуйидагиларни сўзлаб берди.
— Рўза ойлари эди. Сёмкалардан ортиб, кундузи бир оз ухлаб олмоқчи бўлдим. Одатда уйқуга кетсам, қўл телефонимни ўчириб қўярдим. Ўшанда негадир ўчирмадим. Энди кўзим илинган экан, телефоним жиринглади. Кўтарсам, бир эркак киши ўзини таништириб, спортга бағишланган теледастур бошловчилигига таклиф этди. Ҳайрон бўлиб, рад этдим. “Ахир спорт қаерда-ю мен қаерда?! Концерт бўлганида бажонидил рози бўлардим”, деб тушунтиришга уриндим. “Нега йўқ деяпсиз? Яхши пул тўлаймиз”, деди у кўндиришга уриниб. Мендан ижобий жавоб ололмагач, дангал гапиришга ўтди: “Э-э-э… Муддаога ўта қолай, сиз билан танишмоқчи эдим. Ёш эмасман, учта фарзандим, бор…” Энг қизиғи, бегона одам билан уч дақиқадан ортиқ суҳбатлашмасдим. Бу сафар ўз-ўзидан гап-гапга уланиб кетаверди. Роппа-роса қирқ дақиқа суҳбатлашибмиз. Икки кундан кейин қизи Камола билан телефонда гаплашдик. Бу суҳбат ҳам узоқ — бир соат давом этди. Бир-биримизни умуман кўрмаган бўлсак-да, гаплашиб тўймасдик. Орадан бир неча кун ўтиб, уйларига таклиф қилишди. Борсам уй тўла меҳмон, болалар ва қариндош-уруғлар тўпланишган экан. Худди бир-биримизни аввалдан танийдигандек илиқ қарши олишди. Оилага меҳрим тушиб қолди, шундан кейин қизим Камола сарпо-суруқ ва ҳолваларни олиб келиб фотиҳа маросимини ўтказди. Кимдир устимдан кулди, кимдир бахт тилади, — дейди актриса Раъно Зокирова.
“Фарзандларимнинг онасидан миннатдорман”
Актриса турмуш ўртоғининг фарзандларидан меҳр кўргани ва уларнинг онасидан ҳамиша миннатдор эканлигини яширмайди.
— Турмуш ўртоғимнинг биринчи рафиқаси уч фарзандни дунёга келтириб, уларга чиройли тарбия берган. Баъзи болалар оталарини рашк қилишади, совуқ муносабатда бўлишади. Аммо менда ундай бўлмаган. Қизим Аслия ва ўғлим Аслиддин туғилишида қизим Камоланинг катта ёрдами теккан. У ҳамиша ёнимда бўлиб руҳий мадад берган. Турмуш ўртоғимнинг марҳум аёлининг таваллуд кунини ҳамиша нишонлардим. Энг қизиғи, қизим айнан шу куни дунёга келган. Онадан айрилган ўксик қалблар меҳрга ташна бўлишади, дейишади. Мен ҳам имкон қадар фарзандларимизга меҳр беришга ҳаракат қиламан, — дейди актриса Раъно Зокирова.
Раъно Зокирова кўплаб фильм ва сериалларда суратга тушди. Аммо унинг танилишида “Водиллик келин” ва “Ёдгор” сериалларининг ўрни катта бўлган. Актриса бир муддат театрда ҳам фаолият юритган. Аммо фарзандли бўлгач, маълум сабабларга кўра театрдаги фаолиятига якун ясаган. Айни кунларда у асосан сериалларда суратга тушмоқда.
Актриса бу йил тўнғич ўғли Умид Зокировни уйлантирди. Раъно Зокирова теленовеллаларнинг бирида ёш актриса билан танишиб қолади ва уни ўғли билан таништиради. Ёшлар бир-бирига маъқул бўлиб, оила қуришди.
Изоҳ (0)