“Hozircha saylov jarayonlari bo‘yicha hech qanday shikoyat kelib tushmadi” — YXHT kuzatuvchilari O‘zbekistondagi prezidentlik saylovi haqida

YXHT Demokratik institutlar va inson huquqlari bo‘yicha byurosi (DIIHB) kuzatuvchilari O‘zbekistondagi muddatidan ilgari prezident saylovidan so‘ng dastlabki xulosalarini taqdim etish uchun 10-iyul kuni matbuot anjumani o‘tkazdi, deb xabar bermoqda “Daryo” muxbiri.

Missiya raisi Ursula Gashekning ma’lum qilishicha, saylov jarayonida nomzodlarga erkin targ‘ibot olib borish imkoniyati berilgan.

“Saylovda 4 nafar nomzod bor edi, ulardan biri ayol kishi. Barcha ro‘yxatga olingan nomzodlar saylov kampaniyasini erkin tarzda olib bordi. Ularga saylovchilar bilan uchrashish, kerakli materiallardan foydalanish va davlat tomonidan moliyalashtirishda teng munosabat ko‘rsatildi. Bir necha yildan buyon davom etib kelayotgan reformalar ayollarning jamiyat va davlat jarayondagi ishtirokini kengaytirib kelmoqda. 2016-yildan buyon parlamentdagi ayollar soni sezilarli darajada o‘sib, umumiy a’zolarning 30 foizini tashkil etdi. Saylovda ham gender tenglikka e’tibor berildi, ayol nomzod ham boshqalar qatori teng imkoniyatlarga ega bo‘ldi.”, — deydi Ursula Gashek.

Anjumanda ta’kidlanishicha, hozircha saylov yakunlari bo‘yicha shikoyat kelib tushmagan. 

“Oliy sud, Bosh prokuratura va Ichki ishlar vazirligi ma’lumotlariga ko‘ra, hozirga qadar saylov jarayoni va natijalariga doir hech qanday shikoyat kelib tushmagan. Bizning O‘zbekistondagi missiyamiz yana bir hafta davom etadi, agar shu vaqt davomida biror shikoyat paydo bo‘lsa, biz unga, albatta, e’tibor qaratamiz va yakuniy hisobotimizga kiritamiz”, — deydi missiya rahbari.

Ursula Gashekning qayd etishicha, byuro xodimlari O‘zbekistondagi mingga yaqin uchastkada kuzatuv ishlarini olib borgan.

“Kecha, saylov kuni uchastkalarda ovoz berish jarayoni ochilishiga ko‘rilgan tayyorgarlik haqida bilish uchun biz kuzatuvimizni soat 08:00 dan avvalroq boshladik. Butun mamlakat bo‘ylab jarayonni kuzatdik, mingga yaqin uchastkaga tashrif buyurdik va bir vaqtning o‘zida tahlil uchun ma’lumotlarni markaziy ofisimizga yuborib turdik. Tez orada barcha xulosalarimiz aks etgan yakuniy hisobotimizni e’lon qilamiz”, — deya ta’kidladi u.