AQSHda Alsgeymerning rivojlanishini sekinlashtiradigan dunyodagi birinchi dori sotuvga chiqariladi. Bu haqda CBC News xabar berdi.
AQSH oziq-ovqat va farmatsevtika idorasi uning ishlab chiqarilishini to‘liq ma’qulladi. Preparat nafaqat simptomlarga qarshi kurashadi, balki kasallikning rivojlanishini sekinlashtiradi. Eisai and Biogen kompaniyasining Leqembi nomli tegishli dorisi xotira va fikrlashning buzilishini sekinlashtirishi ko‘rsatilgan birinchi preparatdir.
Yanvar oyida dorining dastlabki ma’qullanishi Alsgeymerning dastlabki belgilari bo‘lgan 800 kishida olib borilgan tadqiqot natijalariga asoslanadi. Keyinchalik dorini to‘liq tasdiqlash jarayoni 1800 bemorni qamrab olgan kattaroq tadqiqot natijalari ortidan qabul qilindi.
“Bu dori davo emas. U odamlarning ahvoli og‘irlashishini to‘xtatmaydi, lekin kasallikning rivojlanishini sezilarli darajada sekinlashtiradi. Bu kimdir mashinani boshqarishi uchun qo‘shimcha olti oy yoki bir yil vaqtga ega bo‘lishini anglatadi”, — deydi Sent-Luisddagi Vashington universiteti doktori Joy Snayder.
Leqembi’ning ham kamchiliklari bor, jumladan oyiga ikki marta infuziya qilish zarurati va miya shishishi kabi yon ta’sirlari bo‘lishi mumkin. Alsgeymer assotsiatsiyasiga ko‘ra, boshqa nojo‘ya ta’sirlar infuziya bilan bog‘liq reaksiyalar va bosh og‘rig‘ini o‘z ichiga oladi.
Leqembi bilan davolanish yiliga 26 500 dollarga baholanishi mumkin, bu iqtisodiy ahvoli qiyin bemorlar uchun yuqori narxdir.
Alsgeymer kasalligi demansning (bosh miyaning zararlanishi oqibatida yuzaga keladi va aqliy qobiliyat sezilarli darajada pasayadi) eng keng tarqalgan turi bo‘lib, miyaning to‘g‘ri ishlashini to‘xtatadigan holat. Alsgeymer kasalligi xotira, fikrlash va xatti-harakatlar bilan bog‘liq muammolarni keltirib chiqaradi.
2022-yilda dunyo bo‘ylab Alsgeymer kasalligidan aziyat chekayotganlar soni 55 million kishini tashkil etishi taxmin qilingan. Bu raqam har 20 yilda deyarli ikki barobar ortib, 2030-yilda 78 millionga, 2050-yilda esa 139 millionga yetishi kutilmoqda.
Izoh (0)