Xersonning Rossiya nazoratidagi qismida 6-iyun kuni vayron qilingan Kaxovka GESni qayta tiklash uchun 800 million dollardan 1 milliard dollargacha mablag‘ kerak bo‘ladi. Bu haqda “Ukrgidroenergo” rahbari Ihor Sirota Forbes Ukraine nashriga bergan intervyusida ma’lum qildi.
Sirotaning so‘zlariga ko‘ra, stansiyaning o‘zidan tashqari, ko‘prik va temir yo‘l kesishmasini ham qayta qurish kerak. Bularning barchasi vayron qilingan. “Ukrgidroenergo” rahbari agar qurilish ishi 24/7 soat davom etsa, Kaxovka GESni besh yil ichida qayta qurish mumkinligini bildirdi.
“Bugun loyihani amalga oshiruvchi institut bilan bu masalani muhokama qildik. Bizga allaqachon Italiya va Turkiyadan quruvchilar murojaat qildi”, — dedi Sirota.
Shuningdek, u energetika tizimini barqarorlashtiruvchi roldan tashqari, Kaxovka GESning suv ombori ko‘plab ukrainaliklar va korxonalarni suv bilan ta’minlaganini ta’kidladi.
Kaxovka GES portlashi: Ukraina energetikasiga qanday ta’siri bor?
Ukraina kelajak institutining energetika bo‘yicha eksperti Andrian Prokipning so‘zlariga ko‘ra, energetika tizimi hozirda o‘z ish rejimini o‘zgartirmayapti. Binobarin, iste’molchilarga elektr energiyasi xizmatlari ko‘rsatilmoqda.
“Bizning energetika tizimimiz uchun, albatta, GESning shikastlanishi quvvatni yo‘qotishdir, lekin bu tizimga jiddiy ta’sir ko‘rsatmaydi, chunki stansiya endi elektr energiyasi ishlab chiqarmaydi. Iste‘mol darajasining pasayishi hisobga olinsa, energiya tizimiga ta’sir darajasi minimaldir. Asosiysi, bu hududni suv bosishi bilan bog‘liq gumanitar, ijtimoiy, iqtisodiy oqibatlardir”, — dedi u.
Kaxovka GES portlatilishi
6-iyun kuni Xerson viloyatining Rossiya tomonidan vaqtincha bosib olingan qismida Kaxovka GESning to‘g‘oni portlatildi. Suv Dneprning quyi oqimiga nazoratsiz ravishda oqizilgan. Ukraina va Rossiya bir-birini GESni vayron qilishda aybladi. Suv toshqinlari xavfi ostida qolgan hududlardan aholi evakuatsiya qilinmoqda.
Vladimir Zelenskiyning so‘zlariga ko‘ra, stansiyaning vayron bo‘lishi oqibatida 80 ga yaqin shahar va qishloqlar “suv ostida” qolgan, ularda Rossiyaning keng ko‘lamli bosqinidan oldin kamida 100 ming kishi yashagan. Qrim va Zaporojye atom elektr stansiyasiga suv tanqisligi tahdid solayotgani aytilmoqda.