Херсоннинг Россия назоратидаги қисмида 6 июнь куни вайрон қилинган Каховка ГЭСни қайта тиклаш учун 800 миллион доллардан 1 миллиард долларгача маблағ керак бўлади. Бу ҳақда “Укргидроэнерго” раҳбари Иҳор Сирота Forbes Ukraine нашрига берган интервьюсида маълум қилди.
Сиротанинг сўзларига кўра, станциянинг ўзидан ташқари, кўприк ва темир йўл кесишмасини ҳам қайта қуриш керак. Буларнинг барчаси вайрон қилинган. “Укргидроэнерго” раҳбари агар қурилиш иши 24/7 соат давом этса, Каховка ГЭСни беш йил ичида қайта қуриш мумкинлигини билдирди.
“Бугун лойиҳани амалга оширувчи институт билан бу масалани муҳокама қилдик. Бизга аллақачон Италия ва Туркиядан қурувчилар мурожаат қилди”, — деди Сирота.
Шунингдек, у энергетика тизимини барқарорлаштирувчи ролдан ташқари, Каховка ГЭСнинг сув омбори кўплаб украиналиклар ва корхоналарни сув билан таъминлаганини таъкидлади.
Каховка ГЭС портлаши: Украина энергетикасига қандай таъсири бор?
Украина келажак институтининг энергетика бўйича эксперти Андриан Прокипнинг сўзларига кўра, энергетика тизими ҳозирда ўз иш режимини ўзгартирмаяпти. Бинобарин, истеъмолчиларга электр энергияси хизматлари кўрсатилмоқда.
“Бизнинг энергетика тизимимиз учун, албатта, ГЭСнинг шикастланиши қувватни йўқотишдир, лекин бу тизимга жиддий таъсир кўрсатмайди, чунки станция энди электр энергияси ишлаб чиқармайди. Истеъмол даражасининг пасайиши ҳисобга олинса, энергия тизимига таъсир даражаси минималдир. Асосийси, бу ҳудудни сув босиши билан боғлиқ гуманитар, ижтимоий, иқтисодий оқибатлардир”, — деди у.
Каховка ГЭС портлатилиши
6 июнь куни Херсон вилоятининг Россия томонидан вақтинча босиб олинган қисмида Каховка ГЭСнинг тўғони портлатилди. Сув Днепрнинг қуйи оқимига назоратсиз равишда оқизилган. Украина ва Россия бир-бирини ГЭСни вайрон қилишда айблади. Сув тошқинлари хавфи остида қолган ҳудудлардан аҳоли эвакуация қилинмоқда.
Владимир Зеленскийнинг сўзларига кўра, станциянинг вайрон бўлиши оқибатида 80 га яқин шаҳар ва қишлоқлар “сув остида” қолган, уларда Россиянинг кенг кўламли босқинидан олдин камида 100 минг киши яшаган. Қрим ва Запорожье атом электр станциясига сув танқислиги таҳдид солаётгани айтилмоқда.
Изоҳ (0)