Indoneziyada G‘arbiy Papua mustaqilligi uchun kurashayotgan ayirmachilar yangi zelandiyalik uchuvchi Filip Mertensni qutqarish operatsiyasini olib borayotgan olti nafar indoneziyalik askarni o‘ldirdi, deb xabar bermoqda Avstraliyaning ABC telekanali mahalliy hokimiyatga tayanib.
Gazetaning yozishicha, 15-aprel kuni ayirmachilar Nduga hududidagi harbiy postga hujum qilgan, u yerda 36 nafar Indoneziya askari bor edi. Jurnalistlar tanishib chiqqan harbiy hisobotga ko‘ra, to‘qqiz kishi asirga olingan, 21 kishi yashiringan.
Indoneziya Mudofaa vazirligi vakili polkovnik German Taryaman faqat bir askar halok bo‘lganini tasdiqladi. “Haligacha qancha harbiy halok bo‘lgani va yaralangani maʼlum emas. Qidiruv ishlarimiz davom etmoqda, ammo kuchli yomg‘ir, tuman va aloqa yo‘qligi qidiruv va evakuatsiyani qiyinlashtirdi”, — dedi Taryaman va harbiylar 30 kishini qidirayotganini qo‘shimcha qildi.
CNN ayirmachilarning xabariga tayanib, dam olish kunlari harbiy postlarga kamida ikkita hujum uyushtirilgani, oqibatda 13 kishi halok bo‘lganini yozmoqda. Shuningdek, G‘arbiy Papua ozodlik armiyasi bayonotiga ko‘ra, asirga olingan to‘qqiz nafar indoneziyalik askar o‘ldirilgan.
Ayirmachilar harbiy postlarga qilingan hujumni Indoneziya harbiylari mart oyi oxirida homilador ayol va ikki isyonchini o‘ldirgani uchun “qasos” deb izohlamoqda.
Yangi zelandiyalik uchuvchining garovga olinishi
Filip Mertens — Yangi Zelandiyaning Susi Air charter aviakompaniyasi uchuvchisi. 7-fevral kuni u besh nafar ishchini yangi kasalxona qurish uchun orolning ichki qismidagi chekka hududda joylashgan kichik Paru shahri aeroportiga yetkazgandi. Ayirmachilar samolyotni yoqib yuborishgan, undagi barcha odamlar esa garovga olingan. Bir necha kundan keyin ishchilar papuas aholisiga mansub bo‘lgani uchun qo‘yib yuborilgan. Mertens garovda qolgan.
Ko‘p o‘tmay ayirmachilar Mertensning tirikligini tasdiqlovchi fotosurat va videolarni chop etdi. Ular Indoneziya rasmiylaridan G‘arbiy Papua mustaqilligini tan olishni talab qilib, aks holda uchuvchini o‘ldirishni va’da qildi. Ayrim videolarda Mertensning o‘zi qog‘ozda oldindan tayyorlangan matnni o‘qib, isyonchilarning harakatlarini qo‘llab-quvvatlashini bildirgan. Bunga javoban Indoneziya hukumati G‘arbiy Papua mamlakatning ajralmas qismi ekanini e’lon qildi.
Keyinchalik, rasmiylarning so‘zlariga ko‘ra, ayirmachilar Mertensni qurol va o‘q-dorilarga almashtirishga tayyor ekanini e’lon qilib, ba’zi talablaridan voz kechgan — ammo bu ham hukumat tomonidan rad etilgan.
Mart oyi oxirlarida Mertensni ozod qilish bo‘yicha operatsiyaning asosiy bosqichi boshlandi. Harbiylar va politsiya bo‘lginchilar qarorgohiga hujum qilib, qurolli to‘qnashuvlar yana bir necha kun davom etgan. Ammo u yerdan Filip Mertensni topa olishmagan.
Izoh (0)