Xitoy O‘zbekistonda qo‘shma oliy taʼlim muassasasini qurmoqchi

Xitoy ijtimoiy fanlar akademiyasi instituti direktori O‘zbekistonda qo‘shma oliy taʼlim muassasasi qurish muhimligini aytdi.

Xabarga ko‘ra, O‘zbekistonning Pekindagi elchixonasi tomonidan Xitoy ijtimoiy fanlar akademiyasining Rossiya, Sharqiy Yevropa va Markaziy Osiyo institutida mamlakatdagi konstitutsiyaviy islohotlarga bag‘ishlangan davra suhbati uyushtirildi. Tadbirda mazkur institut rahbariyati, ilmiy xodimlari va tadqiqotchilari, shuningdek, Xitoy zamonaviy xalqaro munosabatlar akademiyasi va Xitoyning “Bir makon, bir yo‘l” tahlil markazi ekspertlari ishtirok etdi.

Muloqot chog‘ida O‘zbekiston-Xitoy munosabatlarining istiqbollari yuzasidan fikr almashildi. Institut direktori Sun Chjuanchji taʼlim sohasida O‘zbekiston-Xitoy hamkorligini yanada kengaytirish, xususan, O‘zbekistonda qo‘shma oliy taʼlim muassasasini tashkil etish muhim ekanligini taʼkidladi.

Xitoy Xalqaro munosabatlar akademiyasi Yevrosiyo instituti direktori Din Syaosin Xitoyning O‘zbekiston bilan va umuman Markaziy Osiyo mamlakatlari bilan hamkorlikni yangi bosqichga olib chiqishdan manfaatdor ekanligini qayd etdi.