Turkiya prezidenti Rajab Toyyib Erdo‘g‘on va rafiqasi Emine Erdo‘g‘on mamlakatda ishlab chiqarilgan Togg T10X elektromobilining birinchi egasi bo‘ldi. Erdo‘g‘on elektrokar Ozarbayjon prezidentiga ham yuborilgani va O‘zbekiston rahbariga ham sovg‘a qilinishini aytdi. Bu haqda TRT Haber xabar berdi.
Turkiya rahbari Ozarbayjon prezidenti Ilhom Aliyevga yetkazib berish amalga oshirildimi yoki yo‘qmi degan savolga bu amalga oshirilishini, yuboriladigan transport vositasining rangi qizil ekanini aytdi. Shuningdek, Erdo‘g‘on mazkur avtomobil Shavkat Mirziyoyevga ham yuborilishini qo‘shimcha qildi.
Anqaradagi prezident majmuida avtomobil kalitlarini tantanali topshirish marosimi bo‘lib o‘tdi.
“Bugundan boshlab biz Toggni yo‘llarda ko‘ramiz”, — dedi Turkiya prezidenti.
Erdo‘g‘on birinchi Togg elektromobilining yaratilishi va ishlab chiqilishi, uning bugungi darajaga ko‘tarilishi texnologik va iqtisodiy taraqqiyot, Turkiyaning jahon miqyosidagi obro‘-e’tibori ramzi ekanini ta’kidladi.
U Togg nafaqat Turkiyada, balki butun dunyoda avtomobil ixlosmandlari orasida shuhrat qozonishiga ishonch bildirdi.
Togg 160 kilovatt quvvatga ega akkumulyatorli, bir quvvatlanishda 314 kilometr masofani bosib o‘tishga qodir. Elektrokarning eng arzon modeli 953 ming lira (50 ming dollardan ortiq), kuchliroqlari 1,215 million turk lira (63 ming dollar) turadi. Birinchi yetkazib berish iyul oyiga rejalashtirilgan.
Izoh (0)