Жиноят ишлари бўйича Мирзо Улуғбек туман судида Ички ишлар вазирлиги ходимини бўғиб ўлдириб, ёқиб юборган шахсларга нисбатан ҳукм ўқилди.
Маълум бўлишича, ҳодиса 2022 йилнинг сентябрь ойида содир бўлган. Судланувчиларидан бири ички ишлар ходимини бўғиб ўлдирган, яна бир судланувчи эса мурдани ёқиб юборган.
“Тилла дўконида ишлайдиган инсон катта миқдордаги қарзини қайтармаслик учун ишхонасига қарашли машинасига укамни алдаб чақирган ва қасддан ўлдирган. Улар укамни тажовузкорона бўғиб ўлдириб, ёқиб юборган ва каналга ташлаб кетишган.
Уч кун деганда топилди. Мана шу ваҳшийларга нисбатан бир умрлик қамоқ жазосини беришингизни талаб қиламиз. 4 фарзанд ота меҳрига зор — ҳали кичиги 1 ёшга ҳам тўлмаган эди”, — дейди марҳумнинг опаси.
“Тўсатдан рўй берди. Мен буни билмаган эдим. Қаттиқ стрессда қўрқиб кетиб, ўзимни бошқаролмай қолдим. Машинани ўзим ҳайдаб кетганман. Эски танишим орқали жиноят содир қилганман. Марҳум ёқиб юборилган. Шеригим уни нима учун ўлдирмоқчи бўлганига жавоб бера олмайман”, — дейди судланувчилардан бири.
Ҳукмга кўра, судланувчилардан бири Жиноят кодексининг 97-моддаси 2-қисми ва 164-модда 4-қисмида назарда тутилган жиноятларни содир этганликда айбли деб топилди ва 24 йил 1 ой муддатга озодликдан маҳрум этилди. Шунингдек, у ўта хавфли рецидивист, деб топилган. Шунингдек, 1986 йилда туғилган судланувчи 24 йил муддатга, 1987 йилда туғилган судланувчи эса 23 йил муддатга озодликдан маҳкум қилинган.
Изоҳ (0)