O‘zbek kino olamida asosan salbiy qahramonlarning mahoratli ijrochisi sifatida tanilgan aktyor Ulug‘bek Muhammadkarimov “Daryo” internet-nashriga eksklyuziv intervyu berdi. Intervyuni jurnalist Feruz Muhammad tashkillashtirdi.
Ulug‘bek Muhammadkarimov suhbat davomida ovozini alkashnikiga o‘xshatishlari, akasi mashhur aktyorligi va teatrda, milliarder Alisher Usmonov buyurtmasi bilan sahnalashtirilgan spektaklda 7 oy ishlab, bir so‘m pul olmagani haqida gapirib berdi.
“Ichib olganlarning manyerasida gapirasan”, deyishadi
— Ovozimni alkashlarnikiga taqqoslashadi. “Ichib olganlarning manyerasida gapirasan”, deyishadi. Ular o‘z tasavvurida shunday ovozi bor insonlar yomon, piyanista va jinoyatchi deb o‘ylashar ekan. Bu Xudo bergan ovoz. O‘zi men sizlarga intervyu berishdan avval sartaroshxonaga kirib, o‘zimga qarab olaman deb uyg‘onsam, uyimdagi suv quvuri yorilib, hammayoqni suv bosib ketibdi. Havo sovuqligidan ta’mirlashda kerak bo‘ladigan temir asbob ham qo‘limga yopishib qolib, azob berdi. To‘g‘risi, men santexniklik, elektriklik va malyarlik ham qilaman. G‘isht terish ham qo‘limdan keladi.
“Chilonzor tumani hokimligida ham ishlaganman”
— Eski shaharda hovlimiz bo‘lar edi, Taxtapulda otamning otasining yerlari bo‘lgan, u yer bizning dala hovlimiz edi. Otam tarixchi bo‘lganlar, onam bilan birga ona tili-adabiyotdan dars berishgan. Eng katta kam Arxitekturani bitirgan, Bekzod akam o‘z xohishlari bilan san’at oliygohiga kirgan. Durbek akam esa musiqachi, skripka chaladi. Hozirgi kundagi ish faoliyati esa shu yerda naqqosh, xattot va madrasaga qarab turish.
Men esa institutni bitirganimdan so‘ng bozordan tashqari bir nechta joylarda ishladim, bozorni soliqchilar tekshirishini ko‘rib, soliqchilik kasbiga qiziqib qoldim. U yerga ishga kirish qiyinligidan, bir muddat Chilonzor tuman hokimligida ishladim. O‘z oilam haqida aytadigan bo‘lsam, to‘rtta farzandim bor, ayolim uy bekasi.
“Faqat Bahodir Yo‘ldoshev mening qiyofamda yaxshi odamni ko‘rganlar…”
— Men uchun kutilmagan vaqtda Akbarxo‘ja Rasulov qo‘ng‘iroq qilib, “ertaga Bahodir Yo‘ldoshevning teatrlariga kelib-keting”, dedi. Borsam Bahodir aka “Yulduzli tunlar”ni sahnaga olib chiqishimiz kerak”, deb aytdilar. Menga qanaqa rol berasiz, deb so‘rasam, Qosimbekni dedilar. Qosimbek Umarshayxning eng yaqin do‘sti va Bobur Mirzoning ustozi bo‘lgan ekan. “Bahodir aka mening qiyofamda yaxshi odam rolini ko‘ribdilar-da”, deb xursand bo‘ldim.
Bahodir Yo‘ldoshev rol ijro etishdan oldin atroflicha barcha voqealarni aytib berar ekanlar. Xullas, ana shu teatrda 7 oy davomida Alisher Uzoqov, Adiz Rajabov, Akbarxo‘ja Rasulov, Yulduz Rajabova, Feruza Normatova kabi aktyorlar bilan birga repetitsiya qildik. Spektakldagi barcha aktyorlarning partnyorlari bor edi. Faqat menda partnyor yo‘q edi, barchasini faqat o‘zim ijro etishim kerak edi. Shunda rejissorimiz menga, “Siz chillalisiz, semirish, shamollash, jarohat olishingiz mumkin emas”, deb aytgan edi.
O‘tib ketgan insonlarning rollarini ijro etganda aktyorga baribir ruhan yuk tushar ekan. Hech qanday og‘ir ish qilmasdan, faqat rol ijro etsak-da tez charchab qolar edik. Repetitsiyalar kunduzgi 09:00-10:00 dan boshlanib kechgacha davom etar edi. Tushlikni ham teatrga olib kelib tanovul qilardik.
Rejissorimiz bolalarga robotdek ijro etyapsizlar, erkinroq ijro etinglar, deb ko‘p tanbeh berardilar. Men repetitsiyalardan keyin o‘zimiz erkin ijro etib ko‘rishni taklif qilganimda esa hech kim ko‘nmadi. Sababi asosiy repetitsiyadan keyin hamma uyga ketish dardida bo‘lar edi.
Kunlardan bir kun rejissordan tanaffus so‘radim. Bahodir Yo‘ldoshev tanaffus berganidan keyin hammamiz tashqariga chiqdik. Qaytib kirsam, sahnadagi dekoratsiya ustida Alisher Uzoqov yotgan ekan. Men obrazga kirib, Qosimbekning Bobur Mirzoga aytadigan so‘zlarini jaydarichasiga aytib ketdim. Alisher ham Bobur Mirzo obrazida menga javob qaytara boshladi. Erkin dialogimiz davomida Alisher o‘rnidan turib, menga qaragach jim bo‘lib qoldi.
Ana shu payt Bahodir Yo‘ldoshev orqa tomonimdan bizni kuzatib turgan ekan. Rejissorimiz bizga “davom ettiringlar” deb, ana shu joyini biz ijro etgandek qoldirdik.
“Bu spektakl milliarder Alisher Usmonovning buyurtmasi ekan”
— Spektakl repetitsiyasi 7 oy davom etdi. Shu vaqtda tirikchiligim ham to‘xtab qoldi, teatrdan bir so‘m pul olmadim. Hammasi ijod uchun bo‘lgan. Eshitishimcha, rejissorimiz Bahodir Yo‘ldoshevga ushbu spektaklni sahnalashtirishimizni milliarder Alisher Usmonov buyurtma qilgan ekan. Biz bu spektaklni sahnalashtirib prezidentimiz Islom Karimovga ko‘rsatishimiz kerak bo‘lib turgan vaqtda O‘zbekiston Respublikasining birinchi prezidenti vafot etdi.
Shundan so‘ng biz spektakl ustidagi ishlarni to‘xtatdik. Lekin bizni teatrda Madaniyat vazirligi, san’at arboblari, oliygohlarning rektorlari va rejissorlar taklif etilib, ular uchun spektaklni namoyish qilib berganmiz. Ularning barchalari ijobiy xulosa berishgan, tabriklashgan. Ammo hamma ishlar to‘xtaganidan keyin teatrdagi hamma o‘z aravasini o‘zi tortishda davom etdi.
Batafsil intervyuni quyida tomosha qilishingiz mumkin.
Izoh (0)