“Овозимни алкашларникига ўхшатишади”. Улуғбек Муҳаммадкаримов акаси машҳур актёрлиги ва театрда ишлаб бир сўм пул олмагани ҳақида (видео)

Ўзбек кино оламида асосан салбий қаҳрамонларнинг маҳоратли ижрочиси сифатида танилган актёр Улуғбек Муҳаммадкаримов “Дарё” интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.

Улуғбек Муҳаммадкаримов суҳбат давомида овозини алкашникига ўхшатишлари, акаси машҳур актёрлиги ва театрда, миллиардер Алишер Усмонов буюртмаси билан саҳналаштирилган спектаклда 7 ой ишлаб, бир сўм пул олмагани ҳақида гапириб берди.

“Ичиб олганларнинг манерасида гапирасан”, дейишади

— Овозимни алкашларникига таққослашади. “Ичиб олганларнинг манерасида гапирасан”, дейишади. Улар ўз тасаввурида шундай овози бор инсонлар ёмон, пияниста ва жиноятчи деб ўйлашар экан. Бу Худо берган овоз. Ўзи мен сизларга интервью беришдан аввал сартарошхонага кириб, ўзимга қараб оламан деб уйғонсам, уйимдаги сув қувури ёрилиб, ҳаммаёқни сув босиб кетибди. Ҳаво совуқлигидан таъмирлашда керак бўладиган темир асбоб ҳам қўлимга ёпишиб қолиб, азоб берди. Тўғриси, мен сантехниклик, электриклик ва малярлик ҳам қиламан. Ғишт териш ҳам қўлимдан келади.

“Чилонзор тумани ҳокимлигида ҳам ишлаганман”

— Эски шаҳарда ҳовлимиз бўлар эди, Тахтапулда отамнинг отасининг ерлари бўлган, у ер бизнинг дала ҳовлимиз эди. Отам тарихчи бўлганлар, онам билан бирга она тили-адабиётдан дарс беришган. Энг катта кам Архитектурани битирган, Бекзод акам ўз хоҳишлари билан санъат олийгоҳига кирган. Дурбек акам эса мусиқачи, скрипка чалади. Ҳозирги кундаги иш фаолияти эса шу ерда наққош, хаттот ва мадрасага қараб туриш.

Мен эса институтни битирганимдан сўнг бозордан ташқари бир нечта жойларда ишладим, бозорни солиқчилар текширишини кўриб, солиқчилик касбига қизиқиб қолдим. У ерга ишга кириш қийинлигидан, бир муддат Чилонзор туман ҳокимлигида ишладим. Ўз оилам ҳақида айтадиган бўлсам, тўртта фарзандим бор, аёлим уй бекаси.

“Фақат Баҳодир Йўлдошев менинг қиёфамда яхши одамни кўрганлар…”

— Мен учун кутилмаган вақтда Акбархўжа Расулов қўнғироқ қилиб, “эртага Баҳодир Йўлдошевнинг театрларига келиб-кетинг”, деди. Борсам Баҳодир ака “Юлдузли тунлар”ни саҳнага олиб чиқишимиз керак”, деб айтдилар. Менга қанақа рол берасиз, деб сўрасам, Қосимбекни дедилар. Қосимбек Умаршайхнинг энг яқин дўсти ва Бобур Мирзонинг устози бўлган экан. “Баҳодир ака менинг қиёфамда яхши одам ролини кўрибдилар-да”, деб хурсанд бўлдим.

Баҳодир Йўлдошев рол ижро этишдан олдин атрофлича барча воқеаларни айтиб берар эканлар. Хуллас, ана шу театрда 7 ой давомида Алишер Узоқов, Адиз Ражабов, Акбархўжа Расулов, Юлдуз Ражабова, Феруза Норматова каби актёрлар билан бирга репетиция қилдик. Спектаклдаги барча актёрларнинг партнёрлари бор эди. Фақат менда партнёр йўқ эди, барчасини фақат ўзим ижро этишим керак эди. Шунда режиссёримиз менга, “Сиз чиллалисиз, семириш, шамоллаш, жароҳат олишингиз мумкин эмас”, деб айтган эди.

Ўтиб кетган инсонларнинг ролларини ижро этганда актёрга барибир руҳан юк тушар экан. Ҳеч қандай оғир иш қилмасдан, фақат рол ижро этсак-да тез чарчаб қолар эдик. Репетициялар кундузги 09:00-10:00 дан бошланиб кечгача давом этар эди. Тушликни ҳам театрга олиб келиб тановул қилардик.

Режиссёримиз болаларга роботдек ижро этяпсизлар, эркинроқ ижро этинглар, деб кўп танбеҳ берардилар. Мен репетициялардан кейин ўзимиз эркин ижро этиб кўришни таклиф қилганимда эса ҳеч ким кўнмади. Сабаби асосий репетициядан кейин ҳамма уйга кетиш дардида бўлар эди.

Кунлардан бир кун режиссёрдан танаффус сўрадим. Баҳодир Йўлдошев танаффус берганидан кейин ҳаммамиз ташқарига чиқдик. Қайтиб кирсам, саҳнадаги декорация устида Алишер Узоқов ётган экан. Мен образга кириб, Қосимбекнинг Бобур Мирзога айтадиган сўзларини жайдаричасига айтиб кетдим. Алишер ҳам Бобур Мирзо образида менга жавоб қайтара бошлади. Эркин диалогимиз давомида Алишер ўрнидан туриб, менга қарагач жим бўлиб қолди.

Ана шу пайт Баҳодир Йўлдошев орқа томонимдан бизни кузатиб турган экан. Режиссёримиз бизга “давом эттиринглар” деб, ана шу жойини биз ижро этгандек қолдирдик.

“Бу спектакл миллиардер Алишер Усмоновнинг буюртмаси экан”

— Спектакл репетицияси 7 ой давом этди. Шу вақтда тирикчилигим ҳам тўхтаб қолди, театрдан бир сўм пул олмадим. Ҳаммаси ижод учун бўлган. Эшитишимча, режиссёримиз Баҳодир Йўлдошевга ушбу спектаклни саҳналаштиришимизни миллиардер Алишер Усмонов буюртма қилган экан. Биз бу спектаклни саҳналаштириб президентимиз Ислом Каримовга кўрсатишимиз керак бўлиб турган вақтда Ўзбекистон Республикасининг биринчи президенти вафот этди.

Шундан сўнг биз спектакл устидаги ишларни тўхтатдик. Лекин бизни театрда Маданият вазирлиги, санъат арбоблари, олийгоҳларнинг ректорлари ва режиссёрлар таклиф этилиб, улар учун спектаклни намойиш қилиб берганмиз. Уларнинг барчалари ижобий хулоса беришган, табриклашган. Аммо ҳамма ишлар тўхтаганидан кейин театрдаги ҳамма ўз аравасини ўзи тортишда давом этди.

Батафсил интервьюни қуйида томоша қилишингиз мумкин.