“Antidemokratiya”: Pokistonda Imron Xon nutqini efirga uzatish taqiqlandi

Pokiston ommaviy axborot vositalarini tartibga soluvchi organi (PEMRA) sobiq bosh vazirni davlat muassasalariga hujum qilish va nafratni targ‘ib qilishda ayblab, telekanallarga Imron Xonning chiqishlari va matbuot anjumanlarini translyatsiya qilishni taqiqladi. Bu haqda Al Jazeera xabar berdi.

Taqiq 4-mart kuni Imron Xon Lahor shahrida nutq so‘zlaganidan so‘ng joriy qilingan. Pokiston sobiq bosh vaziri nutqida 2022-yilning aprel oyida uning hokimiyatdan chetlatilishi ortida sobiq armiya boshlig‘i general Qamar Javed Bajva turganini aytgan. Islomobod politsiyasi Xonni korrupsiya ishi bo‘yicha hibsga olishga uringanidan so‘ng, siyosatchi ayblovlarni rad etgan va hibsdan qochgan.

PEMRA bildirishnomasida Xon “o‘zining davlat muassasalari va zobitlariga qarshi provokatsion bayonotlari orqali asossiz ayblovlar tarqatayotgani va nafrat qo‘zg‘atayotgani, bu qonun va tartibni saqlashga zarar yetkazishi” keltiriladi.

Taqiqdan qariyb ikki soat o‘tgach, media regulyator Xonning Lahordagi nutqini translyatsiya qilgani uchun ARY News xususiy axborot kanali litsenziyani to‘xtatib qo‘ygan.  Xonga xayrihoh hisoblangan axborot kanali tartibni buzgan. Ammo ARY rasmiysi bu ayblovni rad etgan.

“PEMRA bayonoti soat 20:00 dan keyin chiqdi va deyarli barcha kanallar soat 21:00 da Imron Xonning nutqidan lavhalar chiqardi. Biroq tartibga soluvchi organ faqat lisenziyamizni to‘xtatib qo‘ydi”, — dedi ismini oshkor qilmaslik sharti bilan gapirgan ARY rasmiysi.

Pokistonning Inson huquqlari komissiyasi tartibga soluvchi organning Xonning nutqlarini elektron ommaviy axborot vositalarida namoyish qilishni taqiqlash haqidagi qarorini qoraladi.

“Biz doim xoh avvalgi hukumat, xoh yangi, ovozlarni jilovlash choralariga qarshi bo‘lganmiz va insonning siyosiy fikridan qat’iy nazar, so‘z erkinligiga sodiq qolishda davom etamiz”, — deyilgan bayonotda va taqiqni zudlik bilan bekor qilishga chaqirilgan.

PEMRA — bu vosita

Pokistonning “Tehrik-e Insaf” partiyasiga mansub siyosatchi Hammod Azharning aytishicha, mamlakat demokratiyani xavf ostiga qo‘ymoqda.

“Xonning nutqlarini taqiqlash nafaqat konstitutsiyaga, balki so‘z erkinligiga ham ziddir. Siyosatchilarning so‘zlashishini to‘liq taqiqlab bo‘lmaydi. Qonuniylik bilan bog‘liq muammolarni bir chetga surib qo‘ysak, bu juda antidemokratik xususiyatga ega. Hozirgi rejim Imron Xon va uning tobora ortib borayotgan mashhurligidan xayratlandi, endi u bo‘lajak bosh vazir sifatida ko‘rilmoqda. Biz Xon va partiya xodimlariga qarshi politsiya harakatlarining guvohi bo‘lmoqdamiz. OAVda repressiya bor. Biz tezda fashistik davlatga aylanyapmiz”, — dedi u.