Toshkentda PPX xodimlari maktablar atrofida patrullik qilishni boshlaydi

Toshkent shahrida maktab o‘quvchilari xavfsizligini taʼminlash maqsadida har kuni PPX xodimlari patrullik qiladi. Bu haqda “O‘zbekiston 24” telekanali orqali uzatilgan lavhada ma’lum qilindi.

Qayd etilishicha, bolalarning o‘g‘irlanishi haqidagi soxta xabarlar tarqalganidan so‘ng, poytaxtda bolalar xavfsizligi bo‘yicha chora-tadbirlarni kuchaytirishga qaror qilingan.

Endilikda huquq-tartibot idoralari xodimlari har kuni ertalab soat 07:00 dan boshlab kun davomida maktablardagi vaziyatni nazorat qilib boradi, patrul post xizmati xodimlari esa maktablar atrofida, ayniqsa, qorong‘i ko‘chalarda patrullik qiladi.

Bundan tashqari, ota-onalar huquq-tartibot idoralari xodimlari bilan doimo aloqada bo‘lishi uchun maktabdagi barcha Telegram guruhlariga maktablarda faoliyat yurituvchi psixolog inspektorlar qo‘shiladi.

Avvalroq Toshkent shahri hududida so‘nggi 5 yil davomida birorta ham bola o‘g‘irlanishi holati sodir bo‘lmagani, voyaga yetmaganlar bedarak ketgan holatlar bo‘lgani, lekin barcha voyaga yetmaganlar topilgan va oilasiga qaytarilgani to‘g‘risida xabar berilgandi.