Mudofaa vazirligi tizimida xizmat qilayotgan harbiy xizmatchilar uchun 2017-yildan 2021-yilgacha ipoteka kreditlari hisobidan 230 ta koʻpqavatli yashash uylari qurilgan boʻlib, 7,2 ming nafardan ziyod harbiy xizmatchi yangi uyga koʻchib kirdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Qayd etilishicha, 2022-yilda 32 ta 1,2 mingta kvartirali koʻp qavatli uylar barpo etilgan. “Real ehtiyojdan kelib chiqib joriy yilda ushbu koʻrsatkichni oshirish rejalashtirilgan”, — deyiladi vazirlik xabarida.
Ta’kidlash kerakki, 2017-yilgacha bo‘lgan davr mobaynida Mudofaa vazirligi tizimida turar joy ta’minoti ko‘rsatkichlari yiliga 450 tadan oshmagan. O‘zbekiston Prezidentining tegishli qarorlari bilan qabul qilingan tegishli dasturlari doirasida asosida Toshkent shahri va respublika viloyatlari markazlarida qurilish amalga oshirilgan turar joylar hisobi yiliga o‘rtacha 1,5 mingtadan ortiq raqamlarni tashkil etmoqda — bu oldingi davrga nisbatan qariyb uch barobarga ko‘p demak.
Shuningdek, 2022-yilda xizmat majburiyatini oʻtayotgan paytda halok boʻlgan, yaralangan, kontuziya va mayib boʻlgan harbiy xizmatchilarning va ayni vaqtda xizmatda boʻlgan Vatan himoyachilarining 940 nafar farzandlariga oliy taʼlim muassasalariga oʻqishga kirish uchun tegishli imtiyoz tavsiyanomalar berildi. Oʻtgan yilning yozgi mavsumida harbiy xizmatchilarning 2 mingga yaqin farzandlari bolalar sogʻlomlashtirish lagerlarida dam olgan. Oʻgʻil bolalar va qizlar uchun 2580 ta toʻgarak tashkil etilgan, ularga 14 mingdan ziyod yosh bolalar jalb etildi.
Eslatib o‘tamiz, 2022-yil avgustda Prezident qaroriga muvofiq O‘zbekiston Qurolli Kuchlari harbiy xizmatchilari, harbiy xizmatdan rezervga (iste’foga) bo‘shatilgan (chiqarilgan) fuqarolar va ularning oila a’zolarini uy-joy bilan ta’minlash tartibi takomillashtirilgan.
Qarorga ko‘ra, harbiy xizmat majburiyatlarini bajarish vaqtida orttirilgan kasallik yoki olingan jarohati tufayli harbiy xizmatni o‘tashga yaroqsiz deb topilib, rezervga (iste’foga) bo‘shatilgan (chiqarilgan) O‘zbekiston Qurolli Kuchlari harbiy xizmatchilarning, shuningdek, halok bo‘lgan (vafot etgan) harbiy xizmatchilarning, ularning xizmat muddatidan qat’i nazar, oila a’zolari uy-joy bilan ta’minlanadi.
Umumiy harbiy xizmat muddati 20 yil bo‘lgan harbiy xizmatni o‘tab rezervga bo‘shatilgan fuqarolar davlat hisobidan turar joy bilan ta’minlanadi. Shu bilan birga, ularning OTMlarda o‘qish davri hamda davlat organlari va tashkilotlaridagi mehnat faoliyati yillari haqiqiy harbiy xizmat yillari davriga qo‘shib hisoblanadi.
Izoh (0)