Tramp asossiz da’vo tufayli Hillari Klintonga qariyb 1 mln dollar jarima to‘laydi

AQSH Federal sudi Amerika sobiq prezident Donald Tramp va uning advokatini AQSH sobiq davlat kotibi Hillari Klintonga nisbatan asossiz da’vo kiritgani uchun qariyb 1 million dollarga jarimaga tortdi. Bu haqda ABC News xabar bermoqda.

Qayd etilishicha, Trampning da’vo arizasida Klinton va AQSH Demokratik partiyasining 2016-yilgi Amerika prezidenti saylovlariga Rossiyaning aralashuvini o‘rganishda qatnashgan boshqa a’zolari Trampning obro‘siga putur yetkazish maqsadida til biriktirganlikda ayblanadi.

Aniqlik kiritilishicha, sudya Devid Middlbruks o‘z xulosasida Amerika sobiq yetakchisini sudlardan raqiblariga siyosiy bosim o‘tkazish maqsadida foydalanadigan “sud jarayonining tajribali ishtirokchisi” deb atadi. “U o‘z xatti-harakatlari qanday oqibatlarga olib kelishini juda yaxshi anglagan”, — deb yozdi sudya o‘z qarorida Tramp haqida.

2022-yil martida Tramp Klinton va Demokratik partiya rahbariyatini sudga bergandi. U ularni o‘zining Rossiya bilan til biriktirgani haqidagi yolg‘on nazariya yordamida 2016-yilgi saylovlar natijasini o‘zgartirishga urinishda ayblagandi.

2022-yil noyabrida Klinton sudga murojaat qilib, unga qarshi asossiz da’vo kiritgani uchun Tramp va uning advokatlaridan pul kompensatsiyasini undirib berishni talab qilgan.