Ko‘pgina sayyohlar taʼtildan qaytgach, buning oqibatlari haqida o‘ylamasdan, darhol chamadonini karavotga qo‘yishadi. Biroq mikrobiologlar bunday odat o‘ylaganimizdan ham xavfliroq bo‘lishi mumkinligidan ogohlantirdi, deb yozadi Tengri Travel Daily Mailʼga tayanib.
Yangi tadqiqotga ko‘ra, chamadonlarning g‘ildiraklari jamoat hojatxonalarining o‘rindig‘iga qaraganda deyarli 58 baravar iflos bo‘lishi mumkin. Tadqiqotchilar yukning g‘ildiraklari, asosi va tutqichini tekshirdi — natijalar xavotirli edi.
Chamadon nimasi bilan xavfli?
Asosiy muammo — aeroport, ko‘cha va hojatxonalarda g‘ildiraklarning turli yuzalarga tegib turishidir. Tadqiqotda ishtirok etgan mikrobiolog Emi-Mey Poynterning so‘zlariga ko‘ra, yuklar tom maʼnoda balchiqda dumalab, patogenlar, mog‘or va boshqa mikroblarni o‘zida to‘playdi, sayyoh ularni beixtiyor uyiga — gilamlar, karavotlar va hatto ovqatlanish stollariga olib kelishi mumkin.
“Chamadonlar — ayniqsa, ularning g‘ildiraklari va tubi mikroblar uchun haqiqiy magnitdir. Ular ifloslanish darajasi bo‘yicha hojatxonadan osongina o‘tib ketishlari mumkin. Ammo yaxshi yangilik shundaki, oddiy gigiyena choralari bakteriyalarning tarqalishini to‘xtatishga yordam beradi,” dedi mutaxassis.
“Sayohatchi mikroblar”dan qanday himoyalanish mumkin?
Mikrobiolog bir nechta tavsiyalar berdi:
- chamadonni maxsus taglikda saqlash. Aksariyat mehmonxonalarda yukxonalar mavjud. Agar ular bo‘lmasa — dush uchun plastik qalpoqchalardan foydalanish mumkin;
- ko‘lmaklar va iflos yuzalardan saqlaning. Bu har doim ham mumkin emas, ayniqsa shoshilganda, lekin g‘ildiraklarga qancha kam “axlat” tushsa, uyga shuncha kam bakteriya olib kelasiz;
- chamadonni ushlagandan so‘ng qo‘llarni yuvish. Bagaj tutqichlari ham kir yig‘adi;
- uyga qaytgan zahoti chamadonni dezinfeksiya qilish. Antiseptikli salfetkalardan yoki sovunli eritmali lattadan foydalaning;
- agar konstruksiya imkon bersa, olinadigan g‘ildiraklarni yuvish. Ularni iliq suvda sovun bilan ivitish mumkin;
- mato xaltachalarni changyutgichdan o‘tkazing va oziq-ovqat sodasi yoki eritmali yumshoq cho‘tka yordamida mog‘ordan tozalang.
Mutaxassisning so‘zlariga ko‘ra, sayohatda bagajning tozaligini nazorat qilish juda muhim. Chamadon doimo ko‘plab potensial xavfli mikroblar bilan aloqada bo‘ladi, shuning uchun xavf yuqori.
“Biz yuklarimiz bakteriya tashuvchisi ekanligi haqida kamdan-kam o‘ylaymiz. Ammo oddiy qoidalarga rioya qilsangiz, uyingizga mikroblarning kirishiga osongina yo‘l qo‘ymaslik mumkin”, deya xulosa qildi u.
Ilgari mutaxassislar nima uchun hammom mehmonxonadagi eng xavfsiz yukxona ekanini tushuntirib bergan edi. Mutaxassislarning taʼkidlashicha, 2023-yilda Parijda kuzatilgan yotoq kanalarining global epidemiyasidan so‘ng sayohatchilar ehtiyotkor bo‘lib qolishgan. Hammom — bu kanalar uchun boshpana bo‘la oladigan gilam, choyshab va pardalar kabi mato yuzalari bo‘lmagan xonadagi kam sonli joylardan biridir.
Izoh (0)