“Real”, Argentina, Marokash va “Golden Steyt”. AIPS talqiniga ko‘ra yilning eng yaxshi jamoalari aniqlanmoqda

Xalqaro sport matbuoti assotsiatsiyasi (AIPS) yilning eng yaxshi jamoasi bo‘lish uchun nomzodlar ro‘yxatini e’lon qildi.

Undan JCH—2022 yarim finalchilari — Argentina, Xorvatiya, Fransiya va Marokash o‘rin oldi.

Shuningdek, futbol klublaridan “Real”, “PSJ”, “Bavariya” va “Chelsi”, ayollar futbolidan Braziliya hamda Angliya terma jamoalari ro‘yxatga kiritildi.

Undan tashqari, nomzodlar ichida NBA chempioni “Golden Steyt”, hokkey bo‘yicha Finlyandiya terma jamoasi (Olimpiyadani va o‘z uyida Jahon chempionligini qo‘lga kiritdi), voleybol bo‘yicha Braziliya va Italiya terma jamoalari, tog‘ chang‘i sporti bo‘yicha Xitoy terma jamoasi, “Formula-1”dan “Red Bull”, suv polosidan Ispaniya terma jamoasi, yengil atletika bo‘yicha AQSH terma jamoasi, sport gimnastikasidan AQSH ayollar terma jamoasi va figurali uchish bo‘yicha xitoylik juftlik — Venszin Suy hamda Sun Hanlar bor.

Jurnalistlarning ovoz berish jarayoni 29-dekabrga qadar davom etadi.