«Метан газ қуйиш шохобчаларининг аниқ иш вақти бор, лекин ўзгаришлар киритишга мажбур бўляпмиз» — энергетика вазири

Ўзбекистон бош вазири ўринбосари — энергетика вазири Жўрабек Мирзамаҳмудов энергия таъминотидаги узилишлар юзасидан жамоатчиликка мурожаат қилиб, ҳолатга изоҳ берди.

Метан газ қуйиш шохобчаларининг аниқ иш вақтини эълон қилиш мумкинми?

— Албатта, бунинг аниқ ишлаш вақти ёки чеклов пайти бўйича иш олиб боряпмиз. Келишилган графиклар мавжуд. Аммо истеъмолнинг кескин ошиши оқибатида ҳар бир ҳудуднинг ўз хусусиятларидан келиб чиққан ҳолда маҳаллий ҳокимият вакиллари билан биргаликда ҳудудий корхоналаримиз биргаликда ишлаб, «ручной режим»да бошқариб турилибди.

Кундуз кунлари асосан соат 15:00 дан бошланяпти ўчиришлар. Сабаби кечки пайт соат 6, 7 да — одамлар ишдан қайтаётган, овқат пишираётган вақтда трубаларда етарли газ захирасини шакллантириш, босимни ушлаб қолиш мақсадида шундай йўл тутяпмиз.

Эрталабки истеъмол ошган вақтда ҳам худди шунга мослаб газ шохобчалари фаолиятига чеклов киритиляпти. Аниқ графиклар бўлса-да, уларга айрим ҳолларда кунбай ўзгаришлар киритилиши мумкин, — дейди вазир.

Аввалроқ вазир Ўзбекистонда январдаги каби блекаут такрорланиши мумкинлиги ҳақида маълумот берганди. Шунингдек, Ўзбекистон, Қозоғистон ва Россия ўртасида газ иттифоқи ташкил этиш учун сунъий тақчиллик яратилаётгани тўғрисидаги миш-мишларга ҳам муносабат билдириб ўтилган.