Energiya resurslari yetishmovchiligidan ko‘proq tadbirkorlar zarar ko‘radi. Bunga kim javobgar?

O‘zbekiston bosh vaziri o‘rinbosari — energetika vaziri Jo‘rabek Mirzamahmudov energiya ta’minotidagi uzilishlar yuzasidan jamoatchilikka murojaat qilib, holatga izoh berdi.

Energiya resurslari yetishmovchiligidan asosan tadbirkorlar zarar ko‘radi. Bunga kim javob beradi?

— Bu yerda shartnomaviy majburiyatlar bor. Unda avariyaviy o‘chish yoki shunday cheklovlar kiritilgan paytdagi o‘chirilishlar bo‘yicha ham ikki tomonlama kelishuvlar keltirib o‘tilgan. Lekin ogohlantirishsiz o‘chirish, boshqa sabablarga ko‘ra uzilishlar bo‘lsa, albatta, ta’minotchining majburiyatlarida ko‘zda tutilgani bo‘yicha tegishli zarar qoplab beriladi.

Lekin, yana bir bor ta’kidlab o‘taman, shartnomaviy majburiyatlarga ko‘ra mana shunday vaqtlarda iste’molni cheklash, uzish yoki qisqartirish ko‘zda tutilgan va bu har bir iste’molchi bilan shunday shartnoma imzolangan. Bunday holatda, ta’minotchi oldindan ogohlantirish beradi, — deydi energetika vaziri.

Avvalroq O‘zbekistonda yanvardagi kabi blekaut takrorlanishi ehtimoli yuzasidan vazir jamoatchilikka ma’lumot bergandi.