Fransiya prezidenti Emmanuel Makron AQSHga uch kunlik rasmiy tashrif bilan keldi. Bu haqda France24 telekanali xabar bermoqda.
“Makron Vashington tashqarisidagi ‘Endryus’ qo‘shma bazasiga qo‘ndi, u ikki kun poytaxtda bo‘lib, so‘ng Nyu-Orleanga tashrif buyuradi”, — deyiladi xabarda.
Yaqin orada Makron amerikalik hamkasbi Jo Bayden bilan uchrashadi. Davlat rahbarlari nafaqat Ukrainadagi mojaro va Hind-Tinch okeani mintaqasidagi vaziyatni muhokama qilishi, balki Bayden tomonidan joriy yilning avgust oyida imzolangan AQSHda Inflyatsiyani kamaytirish (IRA) to‘g‘risidagi qonuniga ham to‘xtalishi kutilmoqda. Xususan, qonun Amerikada ishlab chiqarilgan elektromobillar uchun subsidiyalar ajratishni nazarda tutadi, bu yanvar oyidan boshlanadi. Nashr qayd etishicha, bunday choralar Yevropa kompaniyalari, jumladan, Germaniyaning BMW yoki Fransiyaning Renault kompaniyalari uchun salbiy oqibatlarga olib keladi.
Nashrning yozishicha, Makron Baydenni qonunni yumshatishga ko‘ndirmoqchi. “Menimcha, bu Jahon savdo tashkiloti me’yorlariga zid va do‘stona ham emas”, — deb fikr bildirgan Fransiya rahbari IRAning qabul qilinishiga.
Izoh (0)