Ukraina tashqi ishlar vaziri Dmitriy Kuleba NATO mamlakatlarini Ukrainaga iloji boricha tezroq qurol-yarog‘ yuborishga va G‘arbda yangi qurol ishlab chiqarish korxonalarini ochishga chaqirmoqda. Bu haqda u Buxarestda NATOga a’zo mamlakatlar vazirlari uchrashuvi doirasida NATO bosh kotibi Yens Stoltenberg bilan qo‘shma brifingda aytib o‘tdi, deb yozadi “Yevropeyskaya Pravda”.

Dmitriy Kulebaning aytishicha, avvalgi uchrashuvda uning asosiy uchta so‘zi “qurol, qurol, qurol” bo‘lgan. O‘shandan buyon, uning so‘zlariga ko‘ra, Ukraina salmoqli darajada yordam olgan, natijada Ukraina qurolli kuchlari o‘z hududining katta qismini ozod etgan.

“Bugun esa men boshqa uchta so‘zni ta’kidlayman — ‘tezroq, tezroq, tezroq’. Shu paytgacha qilingan narsalar uchun minnatdormiz. Ammo urush hali davom etmoqda. Biz Rossiyani tor-mor qilishimiz mumkinligini, g‘olib bo‘lishimiz mumkinligini isbotladik — birgalikda, butun Yevroatlantika makoni va butun dunyo manfaatlari yo‘lida. Biroq G‘arbda qurol taqdim etish, mudofaa sanoatining yangi ishlab chiqarish quvvatlarini ishga tushirish haqidagi qarorlar tezroq qabul qilinishi kerak, qurol yetkazib berish ham tezroq amalga oshirilishi kerak. Biz aynan shu haqda — bularning barchasini qanday qilib tezlashtirish haqida gaplashdik”, — dedi u.

Yens Stoltenberg Buxarestda NATO “Ukrainaga qancha kerak bo‘lsa, shuncha yordam berishda davom etishi kerak”ligini aytdi. Uning so‘zlariga ko‘ra, NATOga a’zo mamlakatlar Ukrainaga qurol yetkazib berish hajmini oshirish haqida kelishib olmoqchi. Alyans bosh kotibi ta’kidlashicha, NATO Ukrainaga yonilg‘i, dori-darmonlar, harbiylar uchun issiq kiyim-bosh va boshqa ko‘makni ko‘proq miqdorda yetkazib berishi kerak.

Avvalroq NATO vakili tashkilot tarkibidagi 30 ta davlatdan 20 tasida Ukrainaga yetkazib berish uchun qurol zaxiralari tugab bitgani haqida The New York Times’ga ma’lum qilgandi. Biroq Fransiya, Germaniya, Italiya va Niderlandiya kabi yirik ittifoqchilar katta miqdorda qurol-yarog‘ taqdim etishda davom etishi mumkin, degan edi u.