Sobiq siyosiy mahbus, Mustaqil komissiya a’zosi, Nukus voqealari ishtirokchilari sudini kuzatib borayotgan “Huquqiy tayanch” birlashmasi rahbari A’zam Farmonov mahbuslarga nisbatan qiynoqlar qo‘llanilmaganini aytmoqda.
Sud majlisida mahbuslarga qiynoqlar bo‘yicha hech kim savol bergani yo‘q. Ammo sudda so‘roq qilinganlarning aksariyati “biz hukumatga qo‘l ko‘targan bo‘lsak ham ular bizga nisbatan noinsoniy harakat qilmadi. Bizga judayam yaxshi muomalada bo‘lishdi, uch mahal issiq ovqat berishdi. Turli vahimalar bo‘ldi, bizning qiynoqqa solinayotganimiz haqida, lekin aslida unday emas. Faqat vijdonimiz og‘riyapti, biz shuncha insonlarning o‘limiga o‘zimizni sababchi deb bilamiz”, deb gapirdi, — deydi A’zam Farmonov.Huquq faoli sudga tortilgan 22 nafar ayblanuvchi xulosasi bilan cheklanmaganini, Nukus voqealarida ayblanib, qo‘lga olinganlardan hech biri qiynoq xususida gapirmaganini ta’kidlamoqda.
Biz faqatgina 22 nafar mahbusning gaplaridan kelib chiqib, qiynoqlar qo‘llanilmagani haqida xulosa qilmayapmiz. Shuncha odam qo‘lga olindi, qanchasi ma’muriy javobgarlikka tortilgach, qamoqdan ozod etildi. Ularning birortasi qiynoqlar haqida davlat organlari yoki OAVga murojaat qilgani yo‘q. Bu gaplar senariy yoki spektakl emas, deb o‘ylayman. Chunki bu haqda ulardan hech kim so‘ragani yo‘q, ularning o‘zlari samimiy so‘zlashmoqda. O‘zlarining emas, vijdoni yoki yaqinlari qiynalgani haqida gapirishyapti. Shu bois bu boradagi gaplar uyushtirilmagan degan fikrdaman, — deya ta’kidladi huquq faoli.
Izoh (0)