Собиқ сиёсий маҳбус, Мустақил комиссия аъзоси, Нукус воқеалари иштирокчилари судини кузатиб бораётган «Ҳуқуқий таянч» бирлашмаси раҳбари Аъзам Фармонов маҳбусларга нисбатан қийноқлар қўлланилмаганини айтмоқда.
Суд мажлисида маҳбусларга қийноқлар бўйича ҳеч ким савол бергани йўқ. Аммо судда сўроқ қилинганларнинг аксарияти «биз ҳукуматга қўл кўтарган бўлсак ҳам улар бизга нисбатан ноинсоний ҳаракат қилмади. Бизга жудаям яхши муомалада бўлишди, уч маҳал иссиқ овқат беришди. Турли ваҳималар бўлди, бизнинг қийноққа солинаётганимиз ҳақида, лекин аслида ундай эмас. Фақат виждонимиз оғрияпти, биз шунча инсонларнинг ўлимига ўзимизни сабабчи деб биламиз», деб гапирди, — дейди Аъзам Фармонов.Ҳуқуқ фаоли судга тортилган 22 нафар айбланувчи хулосаси билан чекланмаганини, Нукус воқеаларида айбланиб, қўлга олинганлардан ҳеч бири қийноқ хусусида гапирмаганини таъкидламоқда.
Биз фақатгина 22 нафар маҳбуснинг гапларидан келиб чиқиб, қийноқлар қўлланилмагани ҳақида хулоса қилмаяпмиз. Шунча одам қўлга олинди, қанчаси маъмурий жавобгарликка тортилгач, қамоқдан озод этилди. Уларнинг бирортаси қийноқлар ҳақида давлат органлари ёки ОАВга мурожаат қилгани йўқ. Бу гаплар сенарий ёки спектакль эмас, деб ўйлайман. Чунки бу ҳақда улардан ҳеч ким сўрагани йўқ, уларнинг ўзлари самимий сўзлашмоқда. Ўзларининг эмас, виждони ёки яқинлари қийналгани ҳақида гапиришяпти. Шу боис бу борадаги гаплар уюштирилмаган деган фикрдаман, — дея таъкидлади ҳуқуқ фаоли.
Изоҳ (0)