Yevropa Ittifoqi sanksiyalarni chetlab o‘tishni jinoyatlar ro‘yxatiga kiritdi
Yevropa Ittifoqi Kengashi sanksiyalarni chetlab o‘tish va ularga amal qilmaslikni Yevropa Ittifoqidagi jinoiy huquqbuzarliklar ro‘yxatiga kiritdi. Bu haqda “RIA Novosti” xabar berdi.
Ma’lum qilinishicha, 2022-yil may oyida Yevrokomissiya sanksiyalarni chetlab o‘tishni jinoiy huquqbuzarliklar ro‘yxatiga kiritishni taklif qilgan. Yevropa komissari Didye Reynders avvalroq bunday qaror Rossiya biznes aktivlarini musodara qilishga yo‘l ochishini aytgandi.
“YeI Kengashi 28-noyabr kuni sanksiyalarni buzish holatlarini Yevropa Ittifoqi jinoyatlar ro‘yxatiga kiritish to‘g‘risidagi qarorni bir ovozdan ma’qulladi”, — deyiladi xabarda.
Hozirgi vaqtda Yevropa Ittifoqi miqyosida jinoyatlar ro‘yxatiga terrorizm, odam savdosi, ayollar va bolalarning jinsiy ekspluatatsiyasi, narkotik va qurol savdosi, korrupsiya, kiberjinoyatchilik va uyushgan jinoyatchilik kiradi.
Ta’kidlanishicha, Yevropa Komissiyasi sanksiyalarni chetlab o‘tish va buzish holatlarini aniqlash hamda bunday qoidabuzarliklarni jazolash bo‘yicha asosiy qoidalarni o‘z ichiga olgan direktiva uchun taklif kiritishi kutilmoqda. Ushbu yo‘riqnoma Yevropa Ittifoqi Kengashi va Yevropa Parlamenti tomonidan ham tasdiqlanishi kerak.
25-may kuni Yevrokomissiya Rossiyaning muzlatilgan aktivlarini musodara qilish, shuningdek, sanksiyalarni buzish holatlarini Yevropa Ittifoqidagi jinoiy huquqbuzarliklar ro‘yxatiga kiritish bo‘yicha takliflar to‘plamini taqdim etgandi.
Ma’lumot o‘rnida, 23-noyabr kuni Yevroparlament Rossiyani “terrorizm homiysi” deb tan olish to‘g‘risidagi rezolyutsiyani qabul qilgandi. 27-noyabr kuni Kreml Yevroparlament Rossiyani “terrorizm homiysi” deb e’lon qilganiga munosabat bildirgandi.
