Rossiyada qurilish sohasida kadrlar taqchilligi kuzatilmoqda

Rossiyada qurilish sohasiga kadrlar yetishmayapti, ruslar bu sohada ishlashni xohlamayapti. Bu haqda Sputnik xabar berdi.

Ma’lum qilinishicha, hozirda sanoatda zarur ishchilar sonining deyarli 25 foizi yetishmaydi, bunday ko‘rsatkich so‘nggi 5 yil davomida kuzatilmagan. Malakali muhandislar taqchil, shu bois qurilish sohasida 2021-yil davomida bo‘sh ish o‘rinlari soni 46 foizga oshgan.

Kadrlar yetishmasligi milliy loyihalar doirasida qurilish hajmining oshishi fonida kuzatilmoqda. Ta’kidlanishicha, qurilish sanoati pandemiyadan keyin kadrlar taqchilligi bilan kurashishga ulgurmay, yana keskin muammoga duch kelgan. Mamlakatda qisman safarbarlik e’lon qilinishi, ayrim mutaxassislarning xorijga ketishi, shuningdek, mehnat muhojirlarining o‘z vataniga qaytishi Rossiyada ham ishchi kuchiga bo‘lgan talab ortib borayotgani sababli vaziyatni yomonlashtirgan. Masalan, Rossiyaning ayrim kompaniyalari investitsiya loyihalarini MDH mamlakatlariga o‘tkazgan, bu esa ushbu respublikalarda muhandis va ishchilarga talabning oshishiga olib keldi.

2022-yilning ikkinchi choragida Rossiyaga ishlash uchun 3,12 millionga yaqin muhojir borgandi, bu 2021-yilga nisbatan rekord ko‘rsatkich. Eng ko‘p migrantlar O‘zbekistondan tashrif buyurgandi.