Eron hukumati mamlakatda namoyishlarni bostirish bo‘yicha Birlashgan millatlar tashkilotining (BMT) yangi tayinlangan mustaqil tergoviga qarshi chiqdi. Bu haqda Al Jazeera xabar berdi.
Ma’lum qilinishicha, Eron o‘tgan bir necha hafta ichida sodir bo‘lgan tartibsizliklarni tekshirish uchun hukumat, sud, parlament va boshqalar vakillaridan iborat mahalliy faktlarni aniqlash missiyasini tuzgan. Mamlakat tashqi ishlar vazirligi matbuot kotibi Kananiyning so‘zlariga ko‘ra, bu Eron davlatining “mas‘uliyatli” xatti-harakati bo‘lib, BMT tergoviga bo‘lgan ehtiyojni rad etadi.
“BMT tergovi mustaqil davlatlarga siyosiy bosim o‘tkazish uchun inson huquqlari mexanizmlaridan foydalandi”, — deydi Eron TIV rasmiysi.
BMT Inson Huquqlari Kengashi Eronning norozilik namoyishlarini bostirish bo‘yicha tergov tayinlash uchun ovoz bergan. Kengash komissari Volker Turk Eronda namoyishlarni bostirishda hukumatning “nomutanosib” kuch ishlatmasligini talab qilgan.
26-noyabr holatiga ko‘ra, ikki oydan ortiq tartibsizliklar davomida 450 nafar namoyishchi o‘ldirilgan, ulardan 63 nafari voyaga yetmaganlardir. Shuningdek, xavfsizlik kuchlarining 60 nafar a’zosi o‘ldirilgan, 18 173 namoyishchi esa hibsga olingan.
Jamiyatning barcha qatlamlaridagi namoyishchilar Islom Respublikasining qonuniyligiga qarshi chiqib, Homanaiyning suratlarini yoqib yuborgan.
Erondagi namoyishlarga nima sabab bo‘ldi?
Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan.Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.
Izoh (0)