Turkiya politsiyasi 30-iyun kuni Muhammad payg‘ambar va Muso alayhissalomni karikatura qilgan 4 nafar shaxsni hibsga oldi. Bu haqda CNN xabar berdi.
Hibsga olinganlar LeMan satirik jurnalining karikaturachilari va bosh muharriri hisoblanadi. Ularning karikaturasida musulmon va yahudiy erkak qanot hamda boshida doirasimon nur bilan aks etgan. Ular urush va raketalar fonida osmonda bir-biri bilan qo‘l berib salomlashayotgani tasvirlangan.
Karikatura ommaga taqdim qilinganidan 4 kun o‘tib ijtimoiy tarmoqlarda keng tarqalib ketgan. Yuzlab odamlar bunga norozilik sifatida Istanbulning asosiy sayyohlik ko‘chasiga chiqib, “Alloh buyukdir” deb hayqirib, namoyishlar o‘tkazgan. Turkiya hukumati ham jurnalni qoralagan.
Ichki ishlar vaziri Ali Yerlikaya karikaturani “provokatsiya” deb baholagan va “bunday qilishga jur’at etganlar qonun oldida javob berishi”ni aytgan. Turkiya prezidenti ma’muriyatining aloqa bo‘limi boshlig‘i Fahriddin Altun karikaturani “e’tiqod va qadriyatlarimizga qabih hujum” deya ta’kidlagan.
Adliya vazirligi hodisa yuzasidan Jinoyat kodeksining 216-moddasi “diniy qadriyatlarni omma oldida haqorat qilish” jinoyati bo‘yicha tergov boshlangan.
Fransiyaning Charlie Hebdo nashriga o‘xshash komikslari bilan tanilgan LeMan satira jurnali ushbu karikaturada payg‘ambarlar tasvirlanmaganini aytib, ayblovlarni rad etgan.
“Bu Muhammad payg‘ambar (s.a.v.)ning karikaturasi emas. Suratda Muhammad ismi Isroil bombardimonlarida halok bo‘lgan musulmon kishiga nisbatan qo‘llangan. Islom olamida Muhammad ismli 200 milliondan ortiq kishi bor. Karikatura hech qanday tarzda Muhammad payg‘ambarga ishora qilmaydi. Halok bo‘lgan musulmonni tasvirlash orqali mazlum musulmon xalqining haqligini ko‘rsatish maqsad qilingan. Diniy qadriyatlarni kamsitish niyati umuman yo‘q edi. Bizga qo‘yilgan da’voni rad etamiz. Payg‘ambarimiz asarda tasvirlanmagan”, deyiladi jurnal bayonotida.
Shuningdek, jurnal karikatura yuzasidan musulmonlardan kechirim so‘ragan. Ichki ishlar vazirligi karikaturachilarning o‘z uylarida qo‘lga olingani va oyoqyalang kishanga solib qo‘yilgani aks etgan videoni ommaga taqdim etgan. Politsiya ularga “xavfsizlik kuchlaridan ham, adolatdan ham qochib qutula olmasligini” ta’kidlagan.
Izoh (0)