Qashqadaryo viloyatidagi bir qator arxeologik obyektlarda qonun buzilish holatlariga yo‘l qo‘yilgani, obyektlarga zarar yetkazilgani ma’lum bo‘ldi. Bu haqda Bosh prokuratura xabar qildi.
Qayd etilishicha, Bosh prokuratura tomonidan Turizm va madaniy meros vazirligi bilan birgalikda Qashqadaryo viloyatida joylashgan madaniy meros obyektlarining saqlanishi, tiklanishi, ta’mirlanishi ahvoli o‘rganilgan. Viloyatda joylashgan 1 468 ta madaniy meros obyektlari tanlov asosida bevosita joyida o‘rganilgan. Natijada 500 dan ziyod madaniy meros meros obyektlaridan foydalanishda qonun buzilishi holatlariga yo‘l qo‘yilgani aniqlangan.
Shuningdek, 11 ta arxeologiya merosi obyektlariga 6 milliard so‘mga yaqin zararlar yetkazilgani aniqlanib, jinoyat ishi qo‘zg‘atilgan.
Jumladan, Qarshi tumanida joylashgan V—VIII asrlarga oid “Do‘ngtepa”, “Nomsiztepa” va “Avliyotepa” arxeologiya merosi obyektlari qisman buzilgan. Oqibatda obyektlarga 1 milliard 488 million so‘mlik zarar yetkazilgan.
Bundan tashqari, o‘rganishda madaniy meros obyektlariga noqonuniy o‘rnatilgan 5 ta tashqi reklama bannerlari olib tashlanishi, ijara shartnomasi tuzmasdan madaniy meros obyektidan foydalanib kelayotgan 10 nafar tadbirkorning faoliyati qonuniylashtirilishi, 11 ta madaniy meros obyektlaridagi noqonuniy qurilmalar buzib tashlanishi ta’minlangan. 37 nafar shaxslar ma’muriy javobgarlikka tortilgan va sudlarga 7 ta ariza kiritilgan.
Nazorat tadbirlari boshqa viloyatlarda ham davom etmoqda.
Izoh (0)