Kim Chen Inning qizi bilan tushgan yangi surati e’lon qilindi

Shimoliy Koreya hukumati 18-noyabr kuni “Xvason-17” ballistik raketalarini uchirishda qatnashgan Kim Chen Inning olimlar va harbiylar bilan tushgan suratlarini chop etdi. Ularda KXDR rahbarining qizi ham bor.

Fotosuratlar Koreya markaziy axborot agentligida (KCNA) chop etilgan. Ularda Kim Chen In qizi bilan raketa va harbiy obyekt xodimlari oldida turganini ko‘rish mumkin. KCNA xabariga ko‘ra, Kim Chen In tadbirda “suyukli qizi bilan birga” ishtirok etgan.

Shu bilan birga, agentlik xabarida yangi raketa uchirilishi haqida hech narsa aytilmagan. Qayd etilishicha, KXDR rahbari va uning qizi fotosessiya o‘tkazgan.

Koreya rahbari o‘z qizini ikkinchi marta ommaga ko‘rsatdi. Birinchi marta qizning suratlari 19-noyabr kuni paydo bo‘lgan. O‘shanda Kim qizi bilan Pxenyan xalqaro aeroportidan “Xvason-17” raketasini uchirishda ishtirok etgan.

Janubiy Koreya razvedkasi ma’lumotlariga ko‘ra, Kim Chen In va rafiqasi Li Sol Chjuning ikki qizi va bir o‘g‘li bor. Janubiy Koreyaning Yonhap nashriga ko‘ra, suratdagi qiz Kimning kenja qizi Ju E bo‘lishi mumkin. Nashrning qayd etishicha, qiz tashqi ko‘rinishidan onasiga o‘xshaydi.