Bugun,

  • USD 11095.31
  • RUB 173.84
  • EUR 10772.44

Yelisey saroyida 22-noyabr kuni o‘tgan oliy darajadagi muzokaralardan so‘ng Shavkat Mirziyoyev va Fransiya prezidenti Emmanuel Makron rafiqalari bilan Parijdagi Luvr muzeyida bo‘lgani haqida xabar berilgandi. Saida Mirziyoyeva o‘zining Telegram kanalida muzeyda “O‘zbekiston vohalarining mo‘jizalari. Karvon yo‘llari chorrahasida” ko‘rgazmasi ochilishiga bag‘ishlangan videolavha e’lon qildi.

Foto: Prezident matbuot xizmati

Foto: Prezident matbuot xizmati

Ushbu yorqin voqeaga yurtimiz tarixiga muhabbat bilan bir necha yil astoydil tayyorgarlik ko‘rildi. Ko‘rgazma Yevropa jamoatchiligida katta qiziqish uyg‘otmoqda. Biz dunyoga ochilyapmiz, O‘zbekiston global madaniyatga tobora singib, odamlarga yanada yaqin va tushunarli bo‘lmoqda, — deb yozadi Prezident administratsiyasi Ijro etuvchi apparatining kommunikatsiyalar va axborot siyosati bo‘yicha sho‘ba mudiri.

O‘zbek xalqining boy madaniy merosiga bag‘ishlangan “O‘zbekiston vohalarining mo‘jizalari. Karvon yo‘llari chorrahasida” ko‘rgazmasi prezidentning 2018-yil oktabr oyida Fransiyaga amalga oshirilgan tashrifi davomida erishilgan kelishuvlarga muvofiq tashkil etilgan. Davlat rahbari o‘shanda O‘zbekiston va Fransiya muzeylari hamkorligida ko‘rgazmalar tashkil etish, mamlakatlar o‘rtasida ilmiy va madaniy aloqalarni kengaytirish zarurligini qayd etgan edi. O‘zbekiston Madaniyat va san’atni rivojlantirish jamg‘armasi va Luvr muzeyi o‘rtasida tegishli memorandum imzolangan.

Keyingi uch yil davomida ko‘rgazmalarga puxta tayyorgarlik ko‘rildi. Bir nechta O‘zbekiston va Fransiyaning birgalikdagi ekspeditsiyalari uyushtirilib, ko‘plab arxeologik topilmalar kashf qilindi. Bundan tashqari, Luvr restavratsiyachilari va o‘zbekistonlik mutaxassislar bir nechta bosqichdan iborat keng ko‘lamli tiklash tadbirlarini amalga oshirdi.

Bu ishlar natijasida Luvrning Rishelye zali va Islom bo‘limida xronologik ketma-ketlikda joylashtirilgan beshta bo‘limdan iborat katta ko‘rgazma makoni yaratildi. Bular:

  • “Voha davlatlari va podshohliklari davri: Ipak yo‘lidagi madaniyatlarning muloqoti”;
  • “O‘rta asrlar va san’atning gullab-yashnashi”;
  • “Markaziy Osiyoda islomning tarqalishi, madaniyat va fanda Uyg‘onish davri”;
  • “Ibn Sinodan Chingizxongacha”;
  • “Buyuk imperiyalar davri: Temuriylar va Shayboniylar”.
O‘zbekiston tarixining 1500 yildan ortiq davrini qamrab olgan ko‘rgazma mamlakatning 16 muzeyidan 138 ta noyob ashyo, shu jumladan, ko‘rgazma uchun maxsus restavratsiya qilingan 70 ta eksponatdan iborat. Shuningdek, Fransiya, Buyuk Britaniya va AQSHning yirik muzeylaridan keltirilgan 31 ta buyum ko‘rgazmadan joy oldi.

Luvrdagi ko‘rgazma nafaqat O‘zbekiston va Fransiya xalqlari, balki butun Yevropa va Markaziy Osiyo o‘rtasidagi azaliy tarixiy aloqalarni, do‘stlik va o‘zaro anglashuvni yanada mustahkamlashga xizmat qilishi alohida qayd etildi. Ko‘rgazma 2023-yil 6-mart kuniga qadar davom etadi.

Izoh
Asosiy yangiliklar
Dunyo
Turkiya Finlyandiya va Shvetsiyaning NATOga kirish haqidagi arizalarni alohida-alohida ko‘rib chiqishi mumkin
Mahalliy
Shavkat Mirziyoyev Islom Karimov haykali poyiga gul qo‘ydi
Mahalliy
O‘zbekistonda dollar kursi pastladi