Бухоро вилояти «Хўжадавлат» темир йўл чегара божхона постида Бирлашган Араб Амирликларидан Ўзбекистон орқали Қозоғистонга ўтаётган поезд вагонида 10 миллиард 610 миллион сўмлик ноқонуний тамаки маҳсулотлари ушлаб қолинди.
Божхона ходимлари ҳужжатда контейнерга 20 тоннадан зиёд оғирликдаги муқаддам фойдаланилган авто эҳтиёт қисмлари ортилгани ёзилгани, аслида эса вагонга 700 минг 719 қути сигареталар юкланганини аниқлаган.
Республикамиз ҳудудидан транзит тарзида ҳаракатланаётган юк поезди вагонларидан бирининг инспексион кўрик мажмуасидан олинган рентген тасвири божхона ходимларининг диққатини тортган. Қолаверса, контейнер эшиги ва ички қисмидаги белги ва рақамлар акс этган наклейкалар қўлбола усулда ўзгартириб қўйилгани ҳам шубҳаларни орттирган. Ҳужжатларга кўра, мазкур контейнерга 20 тоннадан зиёд оғирликдаги, муқаддам фойдаланилган авто эҳтиёт қисмлари ортилган бўлиши лозим эди. Аммо тасвирларда вагонга бошқа турдаги товарлар ортилгани аниқ-тиниқ намоён бўлгани сабабли, мазкур контейнерни очиб, юк эгалари иштирокида кўрикдан ўтказишга қарор қилинган.
Ниҳоят контейнер амалдаги тартиблар асосида ва холислар иштирокида очилди ва унда ҳужжатларда кўрсатилган авто эҳтиёт қисмлардан асар ҳам йўқлиги маълум бўлди. Мазкур товарлар ўрнига юк кузатув ҳужжатларида умуман кўрсатилмаган 700 минг 719 қути сигаретлар ортилган экан. Шундай қилиб, ҳужатларда кўрсатилмаган ва вақтинча сақловга олинган 2 турдаги сигаретларнинг умумий қиймати 10 миллиард 610 миллион сўмдан ошмоқда, – дейди Ҳусан Тангриев.
Тамаки маҳсулотлари Ўзбекистонга импорт қилишда акциз солиғига тортиладиган товарлар сирасига киради. Божхона чегараси орқали товарлар транзитини амалга ошираётган юк ташувчилар чегарани кесиб ўтган жойидаги божхона органларига ўтказилаётган товарлар тўғрисидаги, шу жумладан, уларнинг номи, миқдори, вазни ва юклар қиймати ҳақидаги маълумотларни тақдим этишлари шарт. Ҳозирда юқоридаги ҳолат юзасидан божхона органлари томонидан жиноят иши қўзғатилган ва тергов ҳаракатлари олиб борилмоқда.
Афсусуки, бугунги кунда мамлакатда ноқонуний тамаки маҳсулотлари ҳажми ортиб бормоқда. Божхона қўмитаси маълумотларига кўра, жорий йилнинг ўтган 9 ойи давомида қиймати 17 миллиард 700 миллион сўмлик 1,5 миллион қути тамаки маҳсулотларининг Ўзбекистонга ноқонуний олиб кирилиши ва ички ҳудуддаги айланмасига чек қўйилган. Бу кўрсаткич ўтган йилнинг шу даврига нисбатан 9 фозга кўп демакдир. Бу республикага ноқонуний тамаки маҳсулотлари олиб кирилиши ва савдога чиқарилишига қарши курашиш доимгиданда муҳим бўлиб бораётганини англатади. Масъул органлар олдида мазкур муаммони бартараф этишдек долзарб масала кўндаланг турибди.
Изоҳ (0)