Sirdaryo viloyatining Guliston tumanlararo sudi ish beruvchi tomonidan maoshi to‘lanmay kelinayotgan S.X.ga 33 million so‘mlik qarzdorlikni undirib berdi. Bu haqda Oliy Majlisning Inson huquqlari bo‘yicha vakili (ombudsman) xabar berdi.
Qayd etilishicha, ombudsmanning Sirdaryodagi mintaqaviy vakili Shuhrat Alimovga Mirzaobod tumanida yashovchi fuqaro S.X. oylik maoshining ish beruvchi tomonidan to‘lanmay kelinayotgani bo‘yicha murojaat qilgan.
Murojaat o‘rganilishi natijasida, S.X “Mirzaobod chiroyi” dehqon bozori MCHJda ishlagani va 2021—2022-yillarda ishlagan davri uchun ish haqini olmagani ma’lum bo‘lgan.
Shuningdek, u bilan mehnat shartnomasi bekor qilinayotganda 2014—2022-yillardagi mehnat faoliyati bo‘yicha yakuniy hisob-kitob qilinmagani ochiqlangan.
Fuqaro murojaati qonun talablari asosida o‘rganilib, tegishli hujjatlar to‘plangan. Oliy Majlisning Inson huquqlari bo‘yicha vakili (ombudsman) tomonidan murojaatchi manfaatida sudga da’vo arizasi kiritilgan.
Shuningdek, fuqarolik ishlari bo‘yicha Guliston tumanlararo sudi tomonidan fuqaro S.X.ga 33 mln so‘mdan ortiq qarzdorlik undirib berilishi belgilangan.
Murojaatchining Ombudsmanga xabar berishicha, unga to‘lanishi kerak bo‘lgan qarzdorlik summasi to‘liq undirib berildi.
Izoh (0)