Mazda o‘zining moliyaviy hisobotida Vladivostokdagi “Mazda Sollers Manufacturing Rus” MCHJ qo‘shma korxonasidagi ulushini Rossiyaning Sollers Group kompaniyasiga sotganini ma’lum qildi, deb xabar qiladi Meduza.
Bitim 24-oktabr kuni yopilgan. Mazda qo‘shma korxonadagi o‘z ulushini ramziy summaga sotdi — bir yevro. Shartnomada uch yil ichida ulushni sotilgan miqdorida qaytarib olish huquqi saqlab qolingan.
Kompaniya tegishli organlarning roziligini olgach, ulushni “imkon qadar tezroq” o‘tkazish niyatida. Yaponiya kompaniyasi aksiyalarni o‘tkazishdan ko‘rilgan zararni 12 milliard iyen (82 million dollar) deb baholadi.
Sollersning ma’lumot berishicha, guruh Vladivostokdagi qo‘shma korxonadagi Mazda ulushini sotib olib, ehtimol, 2023-yilda zavodni yangi model liniyasida qayta ishga tushiradi. Sollers avvalroq boshqa markadagi avtomobillarni ishlab chiqarishga kelishib olganlarini tan olgan edi.
Ilgari CX-5, CX-9 va Mazda6 modellari Vladivostokdagi zavodda yig‘ilgan. Mart oyida, Ukrainada urush boshlanganidan so‘ng, Mazda zavodga ehtiyot qismlar yetkazib berishni to‘xtatgan va aprel oyining oxirida korxona ishini tugatgan edi. “Kompaniya Sollers bilan muzokaralarni davom ettirgan bo‘lsa-da, biznesni qayta ochish imkoniyatini ko‘rmadi”, — deyiladi Mazda bayonotida.
Rossiyaning Ukrainaga bostirib kirishidan keyin Ford, Mercedes-Benz, Renault va Nissan kabi avtomobil ishlab chiqaruvchilar Rossiya bozorini tark etdi.
Izoh (0)