Самарқанд вилояти ҳокими Эркинжон Турдимов бошчилигидаги делегациянинг Қорақалпоғистонга ташрифи пайтидаги кечки овқати республика бюджети учун салкам 88 миллион сўмга тушган.
Маълум бўлишича, Самарқанд вилояти ҳокимлиги ахборот хизматининг маълумот беришича, Самарқанд вилояти ҳокими ҳам бошқа вилоят раҳбарлари каби Қорақалпоғистон Республикасининг Нукус туманига бириктирилган бўлиб, ўз тажрибаси асосида ҳудудни янада ривожлантиришга кўмаклашмоқда.
Нукус туманини 2022—2024 йилларда ижтимоий-иқтисодий ривожлантириш, аҳоли саломатлигини сақлаш, қурилиш-бунёдкорлик ишлари, янги корхоналарни ишга тушириш ва иш ўринлари яратиш учун Самарқанд вилояти томонидан 898,5 миллиард сўмлик лойиҳалар ишлаб чиқилган.
Мазкур ташаббус асосида ўша куни қиймати 7,2 миллиард сўм бўлган Хотира майдони, 52 миллиард сўмлик лойиҳа асосида барпо этилган йирик савдо мажмуасини ўз ичига олган «Деҳқон бозори» фойдаланишга топширилган.
Қорақалпоғистон Республикаси Вазирлар Кенгашининг 2 ноябрдаги фармойишидан англашилишича, Эркинжон Турдимов бошчилигидаги делегациянинг Нукус туманига сафарида меҳмонларнинг кечки овқатига ишлатилган маблағлар 87 миллион 907 минг 898 сўмни ташкил қилган.
Фармойишга кўра, мазкур маблағлар Вазирлар Кенгашининг захира фонди ҳисобидан ажратилган бўлиб, маблағларни мақсадли сарфлаш Нукус тумани ҳокими Ўмирбай Уснатдиновга юклатилган.
Изоҳ (0)