Bugun,

  • USD 11095.31
  • RUB 173.84
  • EUR 10772.44

Surxondaryoda uch nafar fuqaro shifokorni kaltaklagani haqida xabar berilgan edi. Sog‘liqni saqlash vazirligi matbuot xizmati holat yuzasidan munosabat bildirdi.

Foto: Sog‘liqni saqlash vazirligi matbuot xizmati

Foto: Sog‘liqni saqlash vazirligi matbuot xizmati

Aniqlanishicha, 27-oktabr kuni soat 15:20 da Angor tumani tibbiyot birlashmasining travmatologiya bo‘limida it tishlagan bemorni tibbiy ko‘rikdan o‘tkazayotgan shifokor J.E.ning huzuriga 3 nafar fuqaro salomatligi to‘g‘risida ma’lumotnoma yozib berishini so‘rab kelgan.

Shifokor ularga qabulidagi bemorga yordam ko‘rsatayotganini, ma’lumotnomani esa shundan so‘ng yozib berishini aytgan. Bundan norozi bo‘lgan fuqarolar vrach J.E.ni ayovsiz do‘pposlab, unga jiddiy tan jarohati yetkazgan.

O‘tkazilgan tibbiy tekshiruvlar davomida shifokor J.E.ga bosh miya yopiq jarohati, og‘iz pastki lab yumshoq to‘qimalari lat yeyishi, o‘ng son yumshoq to‘qimalari lat yeyishi va teri osti gematomasi, qorin bo‘shlig‘i a’zolari lat yeyishi, kuchli qontalash tashxisi qo‘yilgan.

Hozir tibbiyot xodimiga tajovuz qilgan ushbu fuqarolarga nisbatan Angor tumani ichki ishlar bo‘limi tomonidan tergovga qadar dastlabki surishtiruv ishlari olib borilmoqda.

Oxirgi paytlarda bemorlar va ularning yaqinlari tomonidan o‘z xizmat vazifasini bajarayotgan shifokor va hamshiralarga nisbatan kuch ishlatish va tajovuz qilish holatlari tez-tez kuzatilmoqda. Shundan kelib chiqib, mamlakatimizda tibbiyot xodimlari faoliyatiga to‘sqinlik qilganlik uchun qonunchilikda tegishli javobgarlik belgilanishi kun tartibidagi muhim masalaga aylandi. Angor tumanida sodir bo‘lgan yuqoridagi holat esa mazkur jarayonni yanada jadallashtirish zarur ekanini yana bir bor ko‘rsatdi.

Eslatib o‘tamiz, 2019—2022-yillar davomida O‘zbekistonda 290 ga yaqin holatda tibbiyot xodimlariga nisbatan turli shakldagi tajovuzlar qilingan. Shu bois ayni paytda Oliy Majlis Qonunchilik palatasida tibbiyot xodimlari faoliyatiga to‘sqinlik qilganlik uchun qat’iy javobgarlik belgilash yuzasidan qonun loyihasi ko‘rib chiqilmoqda, — deyiladi munosabatda.

Izoh
Asosiy yangiliklar
Mahalliy
“Prava”ni yangisiga almashtirib beradigan onlayn xizmat faoliyatida nosozlik kuzatilmoqda
Mahalliy
O‘zbekistonda gaz zapravkalar qayta ochilishi kutilmoqda
Dunyo
Rossiya Belarusga yangi harbiy qismlar joylashtirdi — Ukraina chegara xizmati