Namangandagi issiqxonalarga tabiiy gaz uzluksiz yetkazib berilayotgani ma’lum qilindi

Namanganda tabiiy gazdan foydalanadigan 115 ta issiqxona faoliyat ko‘rsatmoqda. Bu haqda “Daryo” muxbiri Azizbek Abduvaliyev xabar bermoqda.

Issiqxonalardan 59 tasi gulchilikka ixtisoslashgan, qolganlarida esa asosan pomidor va bodring yetishtiriladi. Ularning eng ko‘pi Davlatobod va To‘raqo‘rg‘on tumanlari hissasiga to‘g‘ri keladi.

“Hududgaz Namangan” gaz ta’minoti filiali mutasaddilarining ma’lum qilishicha, viloyatdagi tabiiy gazdan foydalanadigan issiqxonalar kuz-qish mavsumi kelgani sababli bu resursdan uzilgani yo‘q. Aksincha, ularga tabiiy gazdan samarali foydalanish, zamonaviy tejamkor qurilmalar o‘rnatish va ikkilamchi yoqilg‘i zaxiralarini yaratib qo‘yish yuzasidan tavsiyalar berilmoqda.

“Olti yildan beri faoliyat yuritamiz, 16 nafar ishchimiz bor. Har yili Rossiya, Qozog‘iston, Qirg‘iziston kabi davlatlarga 150-200 ming dollarlik pomidor eksport qilamiz. ‘Issiqxonalar tabiiy gazdan uzilarkan‘ degan gap-so‘zlarni eshitib, tushkunlikka tushib qolgandik, chunki xorijga 60 ming dollarlik mahsulot jo‘natish arafasidamiz. Ko‘mir nari borsa ikki-uch kunga yarashi mumkin, baribir gazning o‘rnini bosolmaydi. Gazdan uzilmasligimiz, davlat rahbari darajasida ko‘rsatma berilgani aytildi, mutasaddilar o‘zlari kelib, xavotirga o‘rin yo‘q ekanligini tushuntirishdi. Endi bemalol ishimizni davom ettiraversak bo‘ladi”, — deydi To‘raqo‘rg‘on tumanidagi “Ko‘klam zamini” korxonasi ish boshqaruvchisi Bahriddin Abdullayev.

Ma’lumot uchun, hozirda Namangandagi issiqxonalarga har oy o‘rtacha 5-5,5 million kub tabiiy gaz yetkazib berilmoqda.

Mavzuga doir: O‘zbekistonda issiqxonalar uchun qo‘shimcha 500 mln kub tabiiy gaz yetkazib beriladi