Surxondaryoda shifokorni kaltaklaganlarga nisbatan jinoyat ishi qo‘zg‘atildi

Surxondaryo viloyati Angor tuman tibbiyot birlashmasida travmatolog shifokor qabulga kelgan fuqarolar tomonidan kaltaklagandi. Viloyat prokuraturasi holat yuzasidan jinoyat ishi qo‘zg‘atilganini ma’lum qildi.

Prokuratura bergan ma’lumotga ko‘ra, Angor tumani tibbiyot birlashmasida travmatolog shifokor E.J.ni 27-oktabr kuni taxminan soat 15:00 da tumanning “Navro‘z” mahallasi hududida joylashgan “Tibbiyot birlashmasi” binosining birinchi qavatida o‘ziga tanish bo‘lmagan Termiz shahar “Pattakesar” mahallasida yashovchi D.S. va Samarqand viloyati Urgut tumanida yashovchi G.I. hech bir sababsiz janjal ko‘tarib, shifokor tanasining turli joylariga urib “yengil tan jarohati” yetkazgan.

Mazkur holat yuzasidan 1-noyabr kuni Angor tuman IIB huzuridagi Tergov guruhi tomonidan D.S. va G.I.ga nisbatan Jinoyat kodeksining 277-moddasi (bezorilik) 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.

Tergov harakatlari tuman prokuraturasi tomonidan nazoratga olingan.