Samarqand shahri ma’muriyatining taklifiga binoan, 17—20-oktabr kunlari Yaponiyaning Nara shahri meri Gen Nakagava boshchiligidagi delegatsiya O‘zbekistonda bo‘ldi, deb xabar bermoqda “Dunyo” axborot agentligi.
Qayd etilishicha, O‘zbekistonning Tokiodagi elchixonasi tomonidan tashkil etilgan ushbu safar doirasida Yaponiya delegatsiyasi a’zolari “Samarqand shahri kuni”ga bag‘ishlangan tadbirlarda ishtirok etishgan. Mehmonlar turizm va madaniy meros vaziri Aziz Abduhakimov, Samarqand viloyati hokimi Erkinjon Turdimov va Samarqand shahri hokimi Fazliddin Umarov tomonidan qabul qilingan.
Bo‘lib o‘tgan uchrashuvlar chog‘ida ikki shahar o‘rtasidagi do‘stona munosabatlarni mustahkamlash hamda iqtisodiyot va turizm, ilm-fan, madaniyat va sport kabi qator sohalarda o‘zaro hamkorlikni rivojlantirish, aloqalarni izchil yo‘lga qo‘yish masalalari atroflicha muhokama qilingan.
Uchrashuv yakunida Samarqand va Nara shaharlari o‘rtasida birodarlik aloqalarini o‘rnatish to‘g‘risida bitim imzolangan. Ushbu hujjatni imzolashdan ko‘zlangan maqsad Nara va Samarqand shaharlari ikki mamlakat o‘rtasida Buyuk Ipak yo‘li davrida o‘rnatilgan tarixiy uzviy aloqalarning mavjudligini inobatga olib, turli sohalarda o‘zaro hamkorlik qilish va ikki shaharning birodarlik munosabatlarini rivojlantirish orqali do‘stona aloqalarni chuqurlashtirishga bo‘lgan intilishi bilan izohlanadi.
Ma’lum qilinishicha, 2019-yilning avgust oyida Samarqand va Nara shaharlari o‘rtasida Hamkorlik memorandumi imzolanganidan buyon Nara shahri turli tadbirlarga mezbonlik qilib kelmoqda. Xususan, joriy yilning avgustida Nara shahrida O‘zbekiston va Yaponiya o‘rtasida diplomatiya munosabatlari o‘tnatilganligining 30 yilligi tadbirlari doirasida hamda Samarqand shahrining Nara shahri bilan aloqalar o‘rnatganiga 3 yil to‘lishi munosabati bilan Samarqand shahriga bag‘ishlangan fotoko‘rgazma tashkil qilingan.
Izoh (0)